Mamandardyń aıtýynsha, Oral qalasy tusyndaǵy Shaǵan jáne Derkól ózenderi qaýipti deńgeıden asyp ketti, Derkól ózeniniń gıdrobeketinde qaýipti deńgeı 600-650 sm bolsa, qazir sýdyń deńgeıi 708 santımetrdi qurady. Al, Shaǵan ózeniniń gıdrobeketinde 1264 sm boldy. Jaıyq ózeniniń deńgeıi de sát sanap joǵarylap, qazir 583 sm-di kórsetip tur.
Ádette Shaǵan men Derkól ózeni oblys ortalyǵy mańynda bir-birine qosylyp, sońynan Jaıyqqa quıatyn. Qazir atalǵan úsh ózenniń de arnasy qatar tolyp, toǵysyp ketti. Sóıtip arnasymen aǵyp úlgermeı, jan-jaǵyna jaıyla bastady. Osynyń saldarynan Oral qalasyndaǵy Samal shaǵyn aýdanyna sý jaıyldy.
«Qazirgi ýaqytta Samal shaǵyn aýdanynyń turǵyndaryn qaýipsiz jerlerge, evakýasııalyq pýnktterge kóshirý júrgizilýde. Tótenshe jaǵdaılar men kommýnaldyq qyzmet mamandary jumys istep jatyr», dep habarlady Tótenshe jaǵdaılar departamenti.
Oblys ákimi Narıman Tóreǵalıev Samal shaǵyn aýdanyna baryp, jaǵdaıdy óz kózimen kórip qaıtty. Qutqarýshylar tún ishinde «Samal 3» yqsham aýdanynda aýlalardy qarap shyqty. Turǵyndardyń keıbiri evakýasııadan bas tartqan. Negizinen halyqtyń basym bóligi týystaryna aldyn ala ketken. «Qazir jaryq bar, tuıyqtalýdan qamtamasyz etildi. Evakýasııalaýǵa BQO TJD jeke quramy, apattar medısınasy ortalyǵy, № 28237 áskerı bólimi, Ulttyq ulan № 5517 áskerı bólimi, aýmaqtyq qorǵanys arnaıy tehnıkalarmen júr. Oqıǵa ornynda TJD bastyǵy, oblystyń, qalanyń ákimi jáne onyń orynbasary bar. Tótenshe jaǵdaılar, polısııa departamentterimen kezekshilik uıymdastyrylǵan», dep habarlady qutqarýshylar.
Derkól ózeni boıyndaǵy oblystyq kardıologııalyq ortalyq jáne bilim ınnovasııalyq lıseıi budan buryn qaýipsiz jerge kóshirilgen bolatyn. Sonyń ishinde kardıoortalyqta em alyp jatqan pasıentter – barlyǵy 77 adam, tolyǵymen qalalyq kópbeıindi aýrýhana bazasyna jetkizildi.
О́tken túnde Uzynkól aýylynyń joǵary jaǵyndaǵy sý qoımasy tolyp, bóget buzylý qaýpi tóngendikten aýyldan barlyǵy 705 adam, onyń ishinde 230 bala qaýipsiz jerge kóshirildi. Bul halyqtyń kóbi qaladaǵy týystaryna tarap ketse, 5 adam Podstepnyı kentindegi mektep-ınternatqa, 15 adam Oral qalasyndaǵy №15 mektepke ornalastyrylǵan. Onyń jeteýi – bala. Kóshirý jumystaryna BQO TJD jeke quramy jáne BQO PD kúsh-quraldary tartylǵan.
Qazir Oral qalasynda 8 evakýasııa beketi bar. Ol jerde dárigerler, sanepıdstansa mamandary, polısııa qyzmetkerleri táýlik boıy kezekshilikte júr.
«Mahambet aýylynyń shet jaǵyn sý basyp ketýine baılanysty turǵyndar mektep, klýbqa kóshirilip jatyr. Mektepke qazirgi ýaqytta eki otbasy ákelindi. Mektep qashyqtan oqytýǵa kóshti», dep habarlady bilim basqarmasynyń baspasóz hatshysy.
Osy kúnderi ózge de organdarmen birge polısııa qyzmetkerleri de tilsiz jaýmen kúreste kúni-túni arpalysyp júr. Jalpy oblys boıynsha sý tasqynyna qarsy jumystarǵa barlyǵy 703 polısııa qyzmetkeri men 97 qyzmettik tehnıka jumyldyrylǵan. Ásirese sý basyp ketken eldi mekenderde polısııa kúsheıtilgen rejimde qyzmet atqaryp, evakýasııalanǵan azamattardyń múlkin qorǵap júr.
Batys Qazaqstan oblysy
