Ásemniń qudaı qosqan qosaǵy osydan bir jarym jyl buryn densaýlyǵy kenetten syr berip, kóz jumypty. Artynda qalǵan úsh ul, eki qyzyn jetkizý endi ananyń ıyǵyna artyldy. Úlken qyzy 5-synypta oqıdy. Búginde tirlikke jarap qalǵan qyz anasynyń naǵyz qolǵanaty bolǵan. Sút kenjesi, uly eki jasqa endi toldy. Qaıǵyly jaǵdaıdan keıin ata-enesimen qaıtadan birge tura bastaǵan. Kúıeýi jeke «KamAZ» kóligimen karerden qum, shaǵal tas satyp otbasyn baqqan. Ásemniń negizgi mamandyǵy – bastaýysh synyp muǵalimi. Alaıda óziniń mamandyǵy boıynsha jumys istemegen. Kúıeýi ózim baǵamyn, bala-shaǵany qarap úıde otyr degen soń, eriniń aıtqanyn tyńdap eshqaıda shyqpaǵan. Bir kúni Ásem joldasyna qolqa salady. «Úıde bosqa otyrǵansha, bir kásippen aınalysaıyn. Qazir memleket jas kásipkerlerge jaqsy kómektesip jatyr. Sol járdemdi biz de alaıyq, Úkimettiń bergen múmkindigin paıdalanyp qalaıyq», deıdi. Bul usynys erine unap, áıeliniń ıdeıasyn qoldaı túsedi. Ekeýi oılana kele atakásip – mal sharýashylyǵyn tańdaıdy.
Bıznes-jospar quryp, mal qora salyp, 2022 jyldyń qarasha aıynda qalalyq ákimdik uıymdastyrǵan granttyq konkýrsta jeńimpaz atanady. Shotqa 1 mln teńgeden astam qarajat túsken boıda kúıeýi mal bazardan 3 sıyr satyp ákeledi. Artylǵan aqshaǵa prestelgen shóp alǵan. Kelesi jyldyń qańtar aıynan bastap Ásem sıyr saýyp, kásipkerlik salasyna alǵashqy qadamyn jasaıdy. Mine, sodan beri Zeńgi baba tóli bul otbasynyń tabys kózine aınaldy.
Ásemniń maıly súti men aıranyna aýyl jurty ábden úırenip, onyń raqatyn dúkenshiler de kórip otyr. Sıyrlary tóldep, eki jyl ishinde iri qara sany toǵyzǵa jetti. Urǵashymen birge arasynda erkek buzaýlar da bar. Ony Ásem aldaǵy ýaqytta bordaqylap satqysy keletinin aıtty. Tek aıran, sút emes, jazdaı qurt jasap ta satady. «Almaqtyń da salmaǵy bar» demekshi, qolǵa tıgen grant qarajatyn maqsatyna saı jumsap jatqanyn arnaıy komıssııa jylyna 3–4 márte kelip tekserip ketedi eken. Grantpen bastaǵan kásibi boıynsha kelinshektiń ózi de byltyr 4 ret esep bergen. Sonymen birge jeke kásipkerlik tólqujatynyń negizinde tapqan tabysyna qaraı memleketke salyq tólep turady.
«Alǵashqyda ishteı júreksiný bolǵany ras. Bastaǵan kásibimiz bolmaı qalsa ne isteımiz dep qorqa beretinmin. Istiń kózin tapqan soń, qorqynyshym seıildi. Túsingenim, kásipkerlik salasynda táýekel men batyldyq kerek eken. Qazir jemshóp qymbat. Sol úshin kóp adam bul kásipke bara bermeıdi. Sıyr saýyp paıda taýyp ketkenim, múmkin, bala-shaǵanyń nesibesine qaraı bolǵan shyǵar. Onyń ústine mal baǵý tózimdilik pen eńbekqorlyqty da qajet etedi. О́zim aýyldyq jerdiń qyzy bolǵandyqtan kishkentaıymyzdan malǵa qarap óstik. Sondyqtan atakásipti jalǵastyrý men úshin asa qıyndyq týǵyzbady. Árıne, aıran-sút satyp shekemiz shylqyp ketpese de, ústinen qalǵan paıda bala-shaǵanyń tamaǵyna jetip, onsha-munsha shyǵyndardy jaýyp otyr. Kúıeýimniń rızashylyǵymen bastaǵan kásibimdi tastamaı, ári qaraı damytyp, bıznesimdi keńeıte tússem dep armandaımyn», deıdi Ásem.
Jýyrda qaladaǵy «Kórme ortalyǵynda» grant qarajatyna bir kásipti qolǵa alǵan azamattardyń ónimderin nasıhattaý, tanystyrý úshin arnaıy kórme uıymdastyryldy. Sol is-sharaǵa Ásem de qatysty. Úlken pavılonǵa qaz-qatar jaıǵasqan shaǵyn kásipkerler óz ónimderin kelýshiler nazaryna usyndy. Solardyń ishinde kásipker kelinshektiń tátti aıran-súti men qurtyn «Donı» kompanııasynyń basshysy erekshe unatyp, óziniń balmuzdaq shyǵaratyn zaýytyna qalaǵan mólsherde shıkizat alyp turý úshin Ásemmen arnaıy memorandýmǵa otyrdy. Osylaısha, qaısar kásipker kásibińe adal bolsań, eńbekqorlyq tanytsań, túbinde áıteýir maqsatyńa jetesiń degen qaǵıdany kópshilikke taǵy bir márte dáleldedi.
ShYMKENT
