«Tehnıkalyq jáne kásibı bilim beretin oqý oryndary eńbek naryǵynyń naqty suranysyna beıimdelýi jáne elimizdiń jańa ekonomıkalyq baǵdarynyń mindetterine saı bolýy kerek» degen Prezıdent sóziniń astarynda úlken mán jatqany ras.
Baızaq aýdanynda ornalasqan №3 Baızaq kolledjinde tehnıkalyq jáne kásiptik bilim berý máselesi nazardan tys qalǵan emes. Bilikti kadrlar orta býyn mamandardy daıarlaýǵa bilek sybanyp kirisken. Izdenis izine túsken shákirtter men oqytýshylar oılap taýyp jatqan jańalyqtar da jetkilikti. Bilekke emes, bilimge sengen shákirtter básekege qabiletti maman retinde qalyptasýdy kókseıdi.
Taıaýda ǵana kolledjdiń «Avtomobıl kóligine tehnıkalyq qyzmet kórsetý, jóndeý jáne paıdalaný» mamandyǵynyń óndiristik sheberi Ashat Súıinbekov pen kolledj stýdenti Ábdimomyn Ismoılov bastaǵan qyz-jigitter óndiristik sabaq barysynda «D-22» shaǵyn traktorynyń sulbasyn qurastyryp shyǵardy. Derekke sensek, bul traktordy sharýashylyq jumystarǵa paıdalanýǵa bolady eken. Tipti sharýa qojalyq basshylary da jańa tehnıkanyń tıimdiligi zor ekenin aıtypty.
«Ustaz ben shákirttiń birlese atqarǵan jumysynyń nátıjesinde paıda bolǵan shaǵyn traktordyń aýyl sharýashylyǵy jumystaryn jeńildetýge tıgizetin paıdasy zor. Kóz úırengen úlken tehnıkanyń kóp jaǵdaıda jylyjaı, saıajaılar jáne óndiristik qojalyqtardaǵy jumystardy ıgerýge múmkindigi bola bermeıtinin ýaqyttyń ózi dáleldep otyr. Mundaı kezde shaǵyn traktorlar sharýa azamattyń senimdi serigine aınalatyny daýsyz. Oǵan esh kúmánimiz joq.
Synaq jumystary kezinde sý jańa shaǵyn traktor tehnıkalyq qaýipsizdikti saqtaý, sharýanyń qarjysy men ýaqytyn únemdeýde óziniń tıimdiligin kórsetti. Traktordyń basqarý mehanızmderi jeńil avtomobılderdiń qurylǵylarynan qurastyrylǵan. Bul da bir jańalyq qoı», deıdi kolledj ádiskeri Lázzat Hıbatova.
Onyń aıtýynsha, «D-22» shaǵyn traktory saǵatyna bir tonna júkti tasymaldaýǵa qaýqarly eken. Al qozǵaltqyshtaǵy motoblok ajyratqyshy basqarý tetigine ornatylǵan. Tehnıkanyń janarmaı quıý bagine úsh lıtrge deıin maı quıýǵa bolady. Jalpy alǵanda, jańa traktor únem turǵysynan úlken tehnıkalarǵa qaraǵanda áldeneshe ese tıimdi kórinedi. Az shyǵynmen kóp jumysty tyndyrýǵa múmkindik týǵyzady.
«Shaǵyn traktordyń áleýeti joǵary ekenin jumys kezinde baıqap kórdik. Munyń «ÝD-2» qozǵaltqyshynda segiz attyń kúshi bar. Sondaı-aq tehnıkanyń shyǵyny bir saǵatta 1,5 lıtr janarmaıǵa teń ekenin aıta ketken jón. Jalpy, qurylǵynyń agregattarmen qosqandaǵy salmaǵy bar bolǵany 250 kılogramdy qurady. Traktordy is barysynda synap kórgen kezde sharýalardyń barlyǵy shaǵyn tehnıkanyń tıimdiligi zor ekenin tilge tıek etti», deıdi ol.
Jambyl oblysy
