Mamandardyń aıtýynsha, Oral qalasy tusyndaǵy Shaǵan jáne Derkól ózenderi qaýipti deńgeıden asyp ketti, Derkól ózeniniń gıdrobeketinde qaýipti deńgeı 600-650 sm bolsa, qazir sýdyń deńgeıi 708 santımetrge jetti. Al Shaǵan ózeniniń gıdrobeketinde 1 264 sm boldy. Jaıyq ózeniniń deńgeıi de sát sanap joǵarylap, qazir 583 sm-di kórsetip tur.
Ádette Shaǵan men Derkól ózeni oblys ortalyǵy mańynda bir-birine qosylyp, sońynan Jaıyqqa quıatyn. Qazir atalǵan úsh ózenniń de arnasy qatar tolyp, toǵysyp ketti. Sóıtip sý arnamen aǵyp úlgermeı, jan-jaǵyna jaıyla bastady. Osynyń saldarynan Oral qalasyndaǵy Samal shaǵyn aýdanyna sý jaıyldy.
«Qazirgi ýaqytta Samal shaǵyn aýdanynyń turǵyndaryn qaýipsiz jerlerge, evakýasııalyq pýnktterge kóshirip jatyr. Buǵan Tótenshe jaǵdaılar men kommýnaldyq qyzmet mamandary jumyldyrylǵan», dep habarlady Tótenshe jaǵdaılar departamenti.
Oblys ákimi Narıman Tóreǵalıev tún ishinde Samal shaǵyn aýdanyna baryp, jaǵdaıdy óz kózimen kórip qaıtty. Qutqarýshylar túni boıy «Samal 3» shaǵyn aýdanynda aýlalardy qarap, daýys kúsheıtkishpen qaýipti eskertip, qalyp qoıǵan adamdardy alyp shyqty. Turǵyndardyń keıbiri evakýasııadan bas tartqan. Negizinen halyqtyń basym bóligi týystaryna aldyn ala ketken.
«Qazir jaryq bar, tuıyqtalýdan qamtamasyz etildi. Evakýasııalaýǵa BQO TJD jeke quramy, apattar medısınasy ortalyǵy, №28237 áskerı bólimi, Ulttyq ulan №5517 áskerı bólimi, aýmaqtyq qorǵanys arnaıy tehnıkalarmen júr. Oqıǵa ornynda TJD bastyǵy, oblystyń, qalanyń ákimi jáne onyń orynbasary bar. Tótenshe jaǵdaılar, polısııa departamentterimen kezekshilik uıymdastyrylǵan», dep habarlady qutqarýshylar.
Derkól ózeni boıyndaǵy oblystyq kardıologııalyq ortalyq jáne bilim ınnovasııalyq lıseıi budan buryn qaýipsiz jerge kóshirilgen edi. Sonyń ishinde kardıoortalyqta em alyp jatqan pasıentter – barlyǵy 77 adam, tolyǵymen qalalyq kópbeıindi aýrýhana bazasyna jetkizildi.
О́tken túnde Uzynkól aýlynyń joǵary jaǵyndaǵy sý qoımasy tolyp, bóget buzylý qaýpi tóngendikten aýyldan barlyǵy 705 adam, onyń ishinde 230 bala qaýipsiz jerge kóshirildi. Bul halyqtyń kóbi qaladaǵy týystaryna tarap ketse, 5 adam Podstepnyı kentindegi mektep-ınternatqa, 15 adam Oral qalasyndaǵy №15 mektepke ornalastyrylǵan. Onyń jeteýi – bala. Kóshirý jumystaryna BQO TJD jeke quramy jáne BQO PD kúsh-quraldary tartylǵan.
Oqıǵa ornynda Parlament Senaty men Májilisi depýtattary Arman О́teǵulov pen Abzal Quspan da júr. «Reseıden keletin ózenderdiń deńgeıi kúrt kóterilgendikten, qazir elimizde eń kúrdeli jaǵdaıdyń biri Batys Qazaqstan oblysynda bolyp tur», dep málimdedi A.Quspan.
Qazir Oral qalasynda 8 evakýasııa beketi bar. Ol jerde dárigerler, sanepıdstansa mamandary, polısııa qyzmetkerleri táýlik boıy kezekshilikte júr.
«Mahambet aýlynyń shet jaǵyn sý basyp ketýine baılanysty turǵyndar mektep, klýbqa kóshirilip jatyr. Mektepke qazirgi ýaqytta eki otbasy ákelindi. Mektep qashyqtan oqytýǵa kóshti», dep habarlady bilim basqarmasynyń baspasóz hatshysy.
Osy kúnderi ózge de organdarmen birge polısııa qyzmetkerleri de tilsiz jaýmen kúreste kúni-túni arpalysyp júr. Jalpy, oblys boıynsha sý tasqynyna qarsy jumystarǵa barlyǵy 703 polısııa qyzmetkeri men 97 qyzmettik tehnıka jumyldyrylǵan. Ásirese sý basyp ketken eldi mekenderde polısııa kúsheıtilgen rejimde qyzmet atqaryp, evakýasııalanǵan azamattardyń múlkin qorǵap júr.
Keıingi derekterge qaraǵanda, oblys aýmaǵynda 5 myńǵa taıaý turǵyn qaýipsiz jerge kóshirilgen, onyń teń jartysy – balalar. «Qazir evakýasııalyq beketterde 1 myńnyń ústinde adam jatyr, qalǵan 3 853 adam týystaryn ýaqytsha panalady», delingen tótenshelikter taratqan aqparatta.
Qutqarýshylar adam ǵana emes, tórt túlik maldyń da jaǵdaıyn oılastyryp, qazir 3 myńnan asa haıýanat qaýipsiz jerge shyǵarylǵan.
Qazirgi ýaqytta óńirdiń 10 eldi mekenimen qarym-qatynas úzilgen. Biraq ol aýyldardyń turǵyndary azyq-túlikten tapshylyq kórmepti. Sebebi aldyn ala kerek-jaraq zattardy jetkizý uıymdastyrylǵan. Ulttyq ulanǵa qarasty MI-171 tikushaǵy arqyly Qaratóbe aýdanynyń Qorjyn jáne Úshana aýyldaryna 2 tonna azyq-túlik jetkizilgen.
Qutqarý jumystarynda túrli mekeme-uıymdardan 2 myńdaı adam júr, 365 tehnıka, 76 motosorǵy qoldanysta. Búginge deıin 804 773 tekshe metr sý sorylyp, 170 749 qapshyq qum tóselipti.
О́ńirde túrli deńgeıdegi joldardyń 26 jerinen sý basyp ótse, 51 jerdi sý shaıyp, búlingen. Jol mekemeleri olardyń keıbirin qalpyna keltirýge kirisip te ketti.
Batys Qazaqstan oblysy
