Oblys ortalyǵyn qaq jaryp aǵatyn Qylshaqty ózeni alǵash tasyǵanda kórgenbiz. Temirjol jáne avtobeketterden shyǵatyn jolaýshylar aǵyny jalǵyz kópir arqyly ótip, qalaǵa kiredi. Sol kúni kólik nópiri kóp eken. Kópir ústinde polısııa qyzmetkerleri asyqqan, ashýly jolaýshylardy sabyrǵa shaqyryp, tar jerden kidirissiz ótýin qamtamasyz etip jatty. Jan ushyryp júrip istegen isine qarap razy boldyq. Sóıtsek, polısııa qyzmetkerleri jalǵyz Kókshetaý qalasynda ǵana emes óńirdegi sý tasqyny bolýy múmkin qaýipti jerlerdi de qadaǵalaýǵa alypty. Qadaǵalaý ǵana emes, qol ushyn berý, kómektesý, janashyrlyq jasaý. Qaýip tóngende elgezektik tanytyp, ýaqytpen sanaspaı qyzmet etkenderine razy bolystyq. Avtobeket mańyndaǵy turǵyn úıler men balabaqsha, aýrýhana qarǵyn sý astynda qalǵanda aldymen jetip, kómek kórsetti. Bul iste patrýldik polısııa batalonynyń jeke quramy men ýchaskelik ınspektorlar jumyldyryldy. Polısııanyń aǵa leıtenanty Ádilhan Murat tańsáriden osynda eken. Temirjol beketi aýmaǵynda ornalasqan stasıonarlyq polısııa qosynyna aýysa otyryp, áriptesterimen birge qaýipti ýchaskedegi jol qozǵalysyn retteýde. Júrgizýshiler de ýaqytsha qolaısyzdyqty túsinip, tártip saqshylarynyń zańdy talaptaryn múltiksiz oryndap jatyr.
Oblysta polısııa qyzmetkerleri kúsheıtilgen rejimdegi jumysqa kóshken. Departament basshylyǵynyń tapsyrmasyna oraı qaýipti jerlerge qosymsha beketter men patrýldik jasaqtar ornalastyrylǵan. Jumys ta jeńil emes. О́ńirdegi respýblıkalyq jáne oblystyq mańyzdaǵy kúre joldardyń boıynda sý oryp ketý qaýpi bar júzge jýyq jer bar eken. Mundaı jerlerdiń barlyǵy – polısııa baqylaýynda. Qazirgi tańda qaýipti ýchaskelerde 700-ge jýyq polısııa jumys istep jatyr. Olar jolaýshylardyń qaýipsizdigin qadaǵalap qana qoımaı, kólikterdiń kidirissiz ótýin qamtamasyz etýde. Eger jaǵdaı kúrdelenip ketse, qosymsha beketter men tyń kúsh tartylmaq. Jergilikti atqarýshy organdarǵa da qoldan kelgeninshe kómek kórsetip jatyr. Mundaıda eń bastysy – adam ómirine qaýip týdyrmaý. Qyzyl sý shaıyp ketken jerlerde avtopatrýlder táýlik boıy kirpik aıqastyrmaı kezekshilik atqaryp jatyr.
Kókshetaýdaǵy polısııa qyzmetkerleri jergilikti atqarýshy organdardyń ókilderimen, halyq qalaýlylarymen jáne eriktilermen birlese otyryp, qyzyl sýdyń kesirinen aýyldan qarǵa adym jer attap shyǵa almaı qalǵan adamdarǵa zárý zattary men azyq-túlik jetkizip jatyr. Taıaýda ǵana Qyzyljuldyz aýyly tabıǵat taqsyretin tartyp, baılanys úzilip qaldy. Mine, osy kezde Kókshetaý qalalyq polısııa basqarmasy bastyǵynyń birinshi orynbasary, podpolkovnık Janat Sháripov, Kókshetaý qalalyq máslıhatynyń tóraǵasy Dastan Ákimov bastaǵan top aýyl turǵyndaryna azyq-túlik jetkizdi. Medısınalyq kómekke muqtaj adamdarǵa da kómek kórsetildi. Qysylǵan shaqta qol ushyn bergen janashyr jandarǵa jalpaq jurttyń aıtar alǵysy mol.
Kókshetaý
