TJM (Tótenshe jaǵdaılar mınıstrligi) qorǵanys salasymen birlesip, aerovızýaldy drondar arqyly ózender men sý qoımalaryndaǵy jaǵdaıǵa turaqty baqylaý júrgizip jatyr. Al keıbir óńirlerdegi ózenderde muz jarý bastaldy.
«Muz keptelisteriniń aldyn alý maqsatynda Aqmola oblysy Selınograd aýdanynyń Preobrajenka aýly mańyndaǵy Nura ózeninde, Shortandy aýdanyndaǵy Kolýton ózeninde, Abaı oblysy Borodýlıha aýdanynyń Krasnyı Iаr aýly mańyndaǵy Ýba ózeninde, Qaraǵandy oblysy Osakarov aýdanynyń Nıkolaev aýlynyń mańyndaǵy Sabyrqoja ózeninde muz jarý jumystary júrgizilip jatyr», delingen TJM baspasóz qyzmetiniń habarlamasynda.
Málimetke sáıkes Abaı, Aqmola, Aqtóbe, Atyraý, Qaraǵandy, Qostanaı, Pavlodar, Ulytaý, Batys Qazaqstan oblystarynyń eldi mekenderindegi tasqynǵa tosqyn qoıý, avarııalyq-qutqarý jumystary, erigen qar sýyn burý, qum salynǵan qaptar tóseý, sýaǵarlardyń jaǵalaryn nyǵaıtý jáne jurtshylyqty qulaqtandyrý men adamdardy qaýipsiz jerlerge evakýasııalaý jalǵasyp jatyr.
«Aqtóbe, Qostanaı, Atyraý, Aqmola, Qaraǵandy oblystarynda 55 jeke turǵyn úı jáne 8 aýla aýmaǵy sý astynda qalǵan (sý tasqyny bastalǵannan beri 1 376 úı jáne 1 319 aýla aýmaǵy). 28 úı men 39 aýla aýmaǵynan erigen qar sýy sorǵyzyldy (sý tasqyny bastalǵannan beri 358 úı men 988 aýla aýmaǵynan sý sorǵyzyldy). 1 345 adam, onyń ishinde 496 bala qutqaryldy (sý tasqyny bastalǵannan beri 17 131 adam, onyń ishinde 6 683 bala). Qazirge deıin 5,7 mln tekshe metrden asa erigen qar sýy sorǵyzylǵan. 638 myńnan asa qap jáne 912 myń tonna ınertti materıal tóseldi», deıdi TJM resmı ókili Dınara Ǵalymjan.
Keıingi derekter boıynsha tez erigen qar sýy Aqmola oblysy Jarqaıyń aýdanynyń Prıgorodnoe aýlyndaǵy 8 jeke turǵyn úıdi basyp qalǵan. 19 adam, onyń ishinde 2 bala jáne 1 júkti áıel qutqarylyp, turǵyndar týystarynyń úılerin ýaqytsha panalaı turýǵa májbúr. Sondaı-aq aýyl turǵyndarynyń 34 bas maly qaýipsiz jerlerge jetkizildi.
«Respýblıkalyq, oblystyq jáne jergilikti mańyzy bar 18 avtojoldy sý shaıdy. Sý shaıǵan 77 avtojol, onyń ishinde 4 kópir jáne 73 jol tósemi, sý júrgen 93 avtojol baqylaýda. Jergilikti atqarýshy organdar halyqpen baılanys ornatyp, qajetti azyq-túlik jáne dári-dármek qorlaryn qurǵan, 67 eldi meken kólik qatynasynsyz qaldy», deıdi D.Ǵalymjan.
Aqtóbe oblysynda «Tereńsaı» bógetiniń sýy arnasynan asyp, Áıteke bı aýdanynyń Áıke aýlyndaǵy 2 jeke turǵyn úıdi sý basqan. Áıke aýlynan Júrgenev aýlyna 297 adam, onyń ishinde 79 bala evakýasııalandy. Al Oıyl aýdanynyń 5 eldi mekenindegi jeke úılerdi sý basýyna baılanysty Qorǵanys mınıstrligi áýe kemeleri arqyly 85 adam, onyń ishinde 27 bala qutqarylǵan. Bul aýdandarda erigen qar sýyn burý men sorǵyzý jáne halyqqa kómek kórsetý jumystary qarqyndy júrip jatyr.
TJM málimetine sáıkes Batys Qazaqstan oblysy Terekti aýdany Uzynkól kentin sý basý qaýpi tónip tur. Egistikterden kelgen mol mólsherdegi qarǵyn sý Uzynkól sý qoımasyn arnasynan asyryp barady. Osyǵan oraı Terekti aýdany Podstepnoe aýlynyń 705 turǵyny aldyn ala evakýasııalandy. Ázirge sý qoımasynyń bógetterin kúsheıtý jumysy qolǵa alyndy.
Avarııalyq-qutqarý jumystaryna TJM, QM, IIM, UQK, jergilikti atqarýshy organdardyń, uıymdardyń 12 myńnan asa adam, 2,5 myń tehnıka, 801 sý aıdaý quraly jáne 105 júzý quraly, 9 áýe kemesi jumyldyrylǵan.
