Joǵary qamqorshylyq keńesiniń tóraǵasy Oljas Bektenov ǵylym men óndiristi ıntegrasııalaýdyń, sondaı-aq Qazaqstan ǵylymı qoǵamdastyǵynyń ǵylymı ınfraqurylymǵa qoljetimdiligin keńeıtý jónindegi naqty mindetterdi atap kórsetti. NU-dyń ónerkásiptik óndiristerge jaqyn ornalasqan óńirlik joǵary oqý oryndarymen ózara is-qımyl jasaý máselelerine erekshe nazar aýdardy.
«Ýnıversıtet ǵylymı jáne bilim berý resýrstaryn damytýdy kúsheıtip, óz ázirlemelerin kommersııalandyrý úshin ónerkásiptik kásiporyndarmen áriptestikti nyǵaıtýǵa tıis. Munyń barlyǵy ǵylymnyń el ekonomıkasyna qosatyn úlesin arttyrýǵa yqpal etedi. Zııatkerlik mektepterdiń áleýetin óńirlerdegi mektepterdi qoldaý úshin barynsha paıdalaný kerek. Mindetimiz – balalardy sapaly bilimmen qamtamasyz etý. Buǵan qajetti qoldaý kórsetiledi», dedi O.Bektenov.
Qazirgi ýaqytta NU zerthanalaryndaǵy zertteýshiler toby jasandy ıntellektini damytý, jasyl tehnologııalardy engizý úshin optoelektronıka salasyndaǵy ınnovasııalardy zertteý, kúrdeli aýrýlardy dıagnostıkalaý jáne emdeý múmkindikterin keńeıtý máselelerimen aınalysady.
«Biz preparattyń birinshi jáne ekinshi fazalaryn bastapqy zertteýdi aıaqtadyq jáne jaqsy nátıjelerge qol jetkizdik. Biz klınıkalyq synaqtardy júrgizýdi jalǵastyramyz, onyń barysynda emdelý kezinde maksımaldy áser alý úshin preparattyń eń joǵary tózimdi dozasyna shyǵý kerek», dedi óz komandasynyń qaterli isikke qarsy tıimdi dári jasaýy týraly National Laboratory Astana (NLA) dırektory Dos Sarbasov.
Onkologııalyq preparatty ázirleý – NLA-nyń jalǵyz jobasy emes. 5 qýatty elektrondy mıkroskoppen jabdyqtalǵan zerthanada jaratylystaný jáne ınjenerlik salalardaǵy startap úshin birlesken zertteýler júrgizedi.
«Zerthanamyzda damytyp jatqan negizgi baǵyttardyń biri – referensti genomdy zertteý. Iаǵnı genomdyq nusqalardyń referensti bazasyn qurý úshin basqa popýlıasııalardan qanshalyqty erekshelenetinimizdi zertteý», dedi NU janyndaǵy NLA ómir týraly ǵylymdar ortalyǵy dırektorynyń mindetin atqarýshy Aınur Aqyljanova.
Ǵalymdar halqymyzdyń «genetıkalyq beınesin» jasaıdy. Bul jumys, mysaly, aýrýlarǵa beıimdilikti anyqtaýǵa kómektesedi. Ol bolashaqta azamattardyń densaýlyǵyn qorǵaýǵa jáne otandyq medısınany damytýǵa úles qosýǵa múmkindik beredi.
NU aqyldy júıeler jáne jasandy ıntellekt ınstıtýtynyń ǵalymdar toby Joǵary qamqorshylar keńesiniń múshelerine sýdy tazartý jáne sýtegi generasııasy boıynsha zertteýler júrgizýge múmkindik beretin I-NURA údetkishin usyndy.
Sonymen qatar Berklıdegi Loýrens Ulttyq zerthanasymen (AQSh) birlese jasalǵan údetkish kórsetildi. Ol sýdy tazartý jáne sýtegi generasııasy boıynsha zertteýler júrgizýge múmkindik beredi.
