Foto: sputnik.kz
Vıse-premer Serik Jumanǵarın quttyqtaý sózinde eki eldiń ózara is-qımylynyń dostyq sıpatyna joǵary baǵa berdi. Qyrkúıek aıynda Qazaqstan men Armenııa arasyndaǵy dostyq pen yntymaqtastyq týraly shartqa 25 jyl tolady.
«Osy jyldar ishinde bizdiń elderimiz memleketaralyq baılanystardy odan ári nyǵaıtýdyń negizin qalady. Ekijaqty jáne kópjaqty is-sharalar aıasynda kelissózder men konsýltasııalar belsendi túrde júrgizip otyr. Biz ekijaqty tártippen de, EAEO aıasyndaǵy ózara is-qımyl formatynda da elderimizdiń naryqtaryna qol jetkizý boıynsha ózara is-qımyldy keńeıtýge jáne nyǵaıtýǵa tıispiz. Úkimetaralyq komıssııa – belgilengen maqsattarǵa jetýdiń negizgi tetikteriniń biri», dedi S.Jumanǵarın.
Sonymen qatar Armenııa vıse-premeri Mger Grıgorıan Úkimetaralyq komıssııanyń ekijaqty kún tártibindegi máselelerdi ilgeriletýdegi jáne jańa baǵyttardy damytýdaǵy sheshýshi rólin atap ótti.
Qazaqstan tarapy eki el arasyndaǵy yntymaqtastyqty keńeıtý aıasynda 348,2 mln dollar somasyna metallýrgııa, munaı hımııasy, tamaq ónerkásibi salasynda óńdelgen 70 eksporttyq taýardan turatyn tizbe qalyptastyryp, qaraýǵa joldady, ÚAK otyrysynda Premer-mınıstrdiń orynbasary «Qorǵas» HShYO aıasynda kooperasııalyq jobalar qurýdy usyndy.
«Armenııa kompanııalaryn Qytaı naryǵyna shyǵý múmkindigin ashatyn «Qorǵas» HShYO qyzmetine belsendi qatysýǵa shaqyramyz. Qazaqstanda qolaıly ınvestısııalyq ahýal qalyptasty, sheteldik ınvestısııalardy yntalandyrý úshin qajetti quraldar jasaldy. Jobalarǵa barlyq kezeńde kómek kórsetiledi», dedi vıse-premer.
Sonymen qatar taraptar aýyl sharýashylyǵy ónimderin qaıta óńdeý salasyndaǵy birlesken jobalardy iske asyrý múmkindikterin, mádenı jáne gýmanıtarlyq baǵyttar boıynsha yntymaqtastyq perspektıvalaryn talqylady.
Anyqtama: Qazaqstan men Armenııa arasyndaǵy saýda aınalymy 2023 jyldyń qorytyndysy boıynsha 23%-ǵa ósti: 43,1 mln dollardan 53,1 mln dollarǵa deıin. Eksport 18,9%-ǵa (28 mln dollardan 33,4 mln dollarǵa), ımport 31%-ǵa (15 mln dollardan 19,7 mln dollarǵa deıin). Qazirgi ýaqytta Qazaqstanda Armenııanyń kapıtaly bar 380-den astam kompanııa jáne ekonomıkanyń túrli sektorynda 72 birlesken kompanııa jumys isteıdi.
