Foto: gov.kz
Jıynǵa tıisti memlekettik organdardyń ókilderi qatysty. Atalǵan baǵytta atqarylyp jatqan sharalar týraly Oqý-aǵartý mınıstriniń orynbasary Edil Ospan baıandady.
Bıylǵy maýsymda mektep jasyndaǵy balalardyń 85%-yn jazǵy belsendi demalys sharalarymen qamtý kózdelip otyr. Aıta keteıik, áleýmettik jaǵynan az qamtylǵan otbasylardan shyqqan balalar úshin lagerlerge tegin joldamalar qarastyrylady.
Daıyndyq sharalaryn úılestirý úshin respýblıkalyq jáne óńirlik deńgeıde shtabtar qurylǵan. Onyń quramyna memlekettik organdardan bólek, salalyq birlestikter te engen.
Mınıstrlik lager túrlerine (jyl boıy qyzmet kórsetetin, eldi meken syrtyndaǵy, mektep janyndaǵy, t.b.) baılanysty biryńǵaı talaptar bekitti.
«Aldyn ala málimet boıynsha elimizde oqýshylar úshin 10,5 myńnan asa lager jumysy uıymdastyrylmaq. Ol jerde demalystan bólek, tanymdyq baǵdarlamalar da qarastyrylady. Qazir biz lagerler jumysyna jaýapty organdar úshin uıymdastyrý tetikteri qarastyrylǵan jadynamalardy ázirledik. Odan bólek demalys ornyndaǵy qaýipsizdik sharalary týraly semınarlar ótkizip, naýqannyń barlyq túrin qamtıtyn ádistemelik quraldardy ázirleýdi qolǵa aldyq», dedi Edil Ospan.
Tamara Dúısenova demalys oryndarynda sanıtarlyq talaptardyń qatań saqtalýy qajettigine mán berdi. Bul rette Densaýlyq saqtaý mınıstrligine lagerlerdiń sáıkestigin jiti tekserýdi tapsyrdy.
«Balalardyń qaýipsizdigi basty nazarda bolýǵa tıis. Bul rette Sanıtarlyq-epıdemıologııalyq qyzmet, Tótenshe jaǵdaılar, Ishki ister mınıstrlikteri birlese jumys atqarǵany jón. Balalarmen jumys isteıtinder arnaıy daıyndyqtan ótýge tıis. Quqyq qorǵaý organdary lagerde qyzmet kórsetetin tulǵalardy aldyn ala tekserýi kerek. Bir sózben aıtqanda, balalardy demalysqa jibergen ata-analar olardyń qaýipsiz jerde júrgenine senimdi bolýy qajet. Buǵan salǵyrt qaraýǵa bolmaıdy», dep eskertti vıse-premer.
Balalardyń jazǵy demalysyn uıymdastyrý sharalary birneshe kezeńge bólinip, tıisti merzimder bekitildi. Tamara Dúısenova múddeli memlekettik organdarǵa daıyndyq jumystarynyń ýaqtyly ári sapaly ótkizilýin qatań baqylaýdy júktedi.
