Foto: Oqý-aǵartý mınıstrligi
Ǵanı Beısembaev ótken jyly Memleket basshysynyń qatysýymen ótken Astanany damytý máselelerine arnalǵan keńesten keıin Oqý-aǵartý mınıstrligi men Astana ákimdigi elordanyń bilim júıesin damytýdyń 2029 jylǵa deıingi jol kartasyn qabyldaǵanyn eske saldy. Ol qujat naqty túıtkilderdi, sonyń ishinde úsh aýysymdy oqytý máselesin sheshýdi qamtıdy.
«Bizdiń basty mindetimiz – balalarymyzǵa barynsha qaýipsiz ári qolaıly jaǵdaı jasaý. Bul máselede elordanyń bilim berý júıesi ózge óńirlerge úlgi bolýy tıis. Mınıstrlik óz tarapynan negizgi mindetterdi sheshýde ákimdikke qoldaý kórsetýdi jalǵastyrýǵa daıyn. Birlesken jumystyń arqasynda ótken jyly ǵana 12 jańa mektep ashyldy. Onyń 10-y mınıstrliktiń qoldaýymen paıdalanýǵa berildi. Bıyl taǵy 27 mektep salynady. Infraqurylymdy damytýmen qatar joǵary bilikti kadrlarmen qamtamasyz etý máselesi sheshilýde. Elordalyq 18 pedagog kadr rezervine kirdi, 7 pedagog basshylyq laýazymdarǵa taǵaıyndaldy», dep atap ótti Ǵanı Beısembaev.
Búginde elordada 175 jalpy bilim beretin mektep, 550 balabaqsha jáne 33 kolledj jumys isteıdi. Mınıstr olardyń jumysymen tanysyp, balalarmen sóılesti. Sabaqtarǵa qatysyp, pedagogtermen kezdesýler ótkizdi.
Áriptesterine arnaǵan sózinde Ǵanı Beısembaev pedagogterdi qoldaý sharalary aldaǵy ýaqytta da jalǵasatynyna toqtaldy. Atap aıtqanda, pedagogterdiń densaýlyǵyn nyǵaıtýyna, biliktiligin arttyrý úshin shetelde tájirıbe almasyp, taǵylymdamadan ótýine erekshe nazar aýdarylady.
