О́ziniń jýrnalıstik jolynda kóptegen erlik jasady. Qazaqtyń Korchagıni atanyp ketken Rahmet О́tesinov aǵamyz týraly jetpisinshi jyldary sonaý Jańaózende topyraq jutyp júrip derekti fılm túsirgen týyndygerdi ómir boıy basshy bolyp, komfort izdegen pende dep kinálaı almaısyz.
Jeltoqsan kóterilisi kezinde Memlekettik teleradıo komıtetiniń tóraǵasy retinde taza qazaqsha arna ashý jóninde issaparmen Máskeýde júrgeninde eldegi alasapyrandy estı sala osylaı qaraı qustaı ushqan azamattyń Otany úshin otqa túsýge bar ekenin bajaılaý qıyn emes.
Elý jyl boıy halyqty qasiretke ushyratqan Semeı polıgonyn jabýǵa tikeleı áser etken adamdardyń biri bolǵan Ǵadilbek Minájulyn «chelovek totalnogo deıstvııa» degen atqa ıe bolǵan Ernest Hemıngýeıge teńegiń keledi.
Aıqyn da ustamdy pozısııasy bar Ǵadilbek Minájulynyń shetelden qashyp kelgen belgili ǵalym, aqyn ári jýrnalıst Aıtan Núsiphandy eshqandaı qujatsyz óz qaramaǵyna qaımyqpaı jumysqa qabyldaǵanyn qandastaryn qoldaýdyń klassıkalyq úlgisi dep aıtqan abzal.
AQSh-tyń eks-prezıdenti, bıyl júz jasqa tolǵaly otyrǵan Djımmı Kartermen talaı ret tabaqtas bolyp, adamzatqa paıdasy bar birneshe jobany birge júzege asyrýǵa qatysqan Ǵadekeńe qyzyǵa qaraıtynbyz.
Almaǵaıyp toqsanynshy jyldardyń bel ortasynda BUU-nyń Bas hatshysy Býtros Galıden suhbat alǵan jalǵyz qazaqtyń shyǵarmashylyq izdenisi men sheberligine qaıta-qaıta qol soqqyń bar.
Eshkimmen aralaspaı, bárinen bezip, úıine tyǵylyp jatqan Lev Nıkolaevıch Gýmılevtiń ómirdegi eń sońǵy syrlasy bolǵan aǵamyzdyń júregi keń adam edi.
Maqash pravıtel (Muhambetjan Bekmuhambetov) týraly jazǵan «Pıatyı son» derekti pýblısıstıkalyq kitaby izdenis pen daryndyqtyń qospasynan týǵan súbeli eńbek bolǵan edi. Onyń mundaı óreli isteriniń bárin tizip shyǵý múmkin emes.
Álemniń ár túkpirindegi órkenıetti bir-birinen bóle-jarmaıtyn, kerisinshe sabaqtastyra túsindiretin onyń erekshe kózqarasy ómir jolynda túıgen tájirıbesi men kemel bilimniń arqasynda kelgeni taıǵa tańba basqandaı anyq bilinetin. Atasy Shalahmet júz jasaǵan kisi edi. Nemeresi de ǵasyrdy ıektep qulasa dep tileıtinmin. «Adamnyń degeni emes, Allanyń qalaýy bolatyny» ras. Baqul bol, aǵa!
Sharhan QAZYǴUL,
pýblısıst-jazýshy
