Balalardyń bul óner baıqaýyna Qaraǵandy, Pavlodar, Petropavl, Almaty, Astana, Qosshy qalalarynyń jas ónerpazdary qatysyp, el namysyn qorǵaǵan edi. О́ńirimizden barǵan elý jyldyq tarıhy bar Botaqara kentindegi «Rýhanııat» óner ortalyǵynyń «Rýhanııat» ansambli «Er-Turan» kúıin kúmbirlete oryndap, qatysýshylardan qara úzip, bas júldeni jeńip aldy. Ansambl quramyndaǵy ónerli jastar jeke oryndaý boıynsha da baq synasyp, óz jas sanattary boıynsha júldeli birinshi orynǵa ıe boldy.
Atap aıtsaq, Nurǵısa Sálimov, Erasyl Igilik, Nurmuhamed Úkibas, Bekarys Serik, Nurasyl Qýandyq laýreat atandy. №2 mýzykalyq mekteptiń shákirti Nurasyl Jáleluly daýylpaz aspabyn az ǵana ýaqyttyń ishinde úırenip alǵan. Ol jeke ózi Qurmanǵazy Saǵyrbaıulynyń «Balbyraýyn» kúıin oryndaǵan. Iаǵnı eki aspapta da erkin oınaıdy. Munymen qosa, jas ónerpaz «Qaraqat» mektep stýdııasynda tálim alyp júr.
«Týǵan kúnime ákem dombyra syılady. Sodan ony tez úırengim kelip, úıirmege jazyldym. Daýylpazda oınaýdy jaqynda ǵana meńgerip aldym. Bul aspap dombyraǵa qaraǵanda jeńil. Qazir «Adaı» kúıin úırenip júrmin. Jıyrmaǵa jýyq kúı tarta alamyn», – deıdi ónerli Nurasyl.
Munymen qosa, ansambldegi Nurǵısa Sálimov halyq ánderi atalymynda óner kórsetip, júldeli ekinshi orynnan kórindi.
Ansambl jetekshisi Jazırash Bımardenova úkilep aparǵan shákirtteriniń joǵary óner kórsetkenine dán rıza.
– Úmitimiz aqtaldy. О́nerli balalarymyz ulttyq aspapta kúı oryndaý, halyq ánderin aıtý, estradalyq baǵyt boıynsha da baq synasty. Osy rette, ata-analaryna aıryqsha alǵysymdy jetkizgim keledi. Shákirtterim birinshi ret halyqaralyq baıqaýdan júldeli bolyp tur. Onyń ústine bas júlde alǵany biz úshin zor mártebe, – deıdi jetekshi ustaz.
Qaraǵandy oblysy
