Foto: dingek.kz
Jaqsylyqty umytpaǵan jurt búginde zardap shekken óńirlerge qoldan kelgen kómegin berip jatyr. Osy oraıda Túrkistan oblysy «Jastar resýrstyq ortalyǵy» ǵımaratynda, óńirdiń barlyq aýdan, qalalarynda shtabtar ashylyp, turǵyndardyń kómegin qabyldaýda. Zardap shekken turǵyndarǵa kómek qolyn sozamyn degen eriktiler men oblys turǵyndary ıgi iske óz úlesterin qosty. Alǵashqy kúnniń ózinde turǵyndar, máslıhat depýtattary, jergilikti jomart azamattar eń qajetti jáne jolǵa jaramdy zattarmen qamtyp úlgerdi. Birinshi júk kóligi Aqtóbege jetkizilip, oblys jastary ony úlestirdi.
Sondaı-aq jýyrda gýmanıtarlyq kómek tıelgen ekinshi kerýen jolǵa shyqty. Túrkistandyqtar 30 tonnaǵa jýyq azyq-túlik, kıim-keshek, kórpe-tósek, turmysqa qajetti zattar jınady. Sol júkti jetkizý úshin aýdandyq jáne qalalyq jastar ortalyǵynan qurylǵan shtab músheleri oblys ortalyǵyna kelip, birlese jumys atqardy. Qajetti zattar júk kólikterine tıeldi. Gýmanıtarlyq kerýendi shyǵaryp salǵan oblystyq qoǵamdyq damý basqarmasynyń basshysy Erlan Kúzembaev ıgi iske úles qosqan óńir jurtshylyǵyna, kásipkerlerge rızashylyǵyn bildirip, sý tasqynynan zardap shekken óńirlerge qoldaý kórsetý jumystary jalǵasatynyn jetkizdi.
Aıta keteıik, Aqtóbe óńirinde Túrkistan oblysynan barǵan erikti jastar qalpyna keltirý jumystaryna qatysyp, zardap shekken turǵyndarǵa kómek kórsetip júr. Sondaı-aq sý tasqynynan zardap shekken óńirlerge tótenshe jaǵdaılar departamentiniń qutqarýshylar toby men arnaıy tehnıkalar jiberildi. Qutqarýshylar Soltústik Qazaqstan oblysyna baryp, qarǵyn sýdyń aldyn alý jumystaryna atsalysty. Kásibı mamandardan quralǵan top tasqyn qaýpi joǵary Ǵabıt Músirepov, Aıyrtaý, Taıynsha jáne Tımırıazev aýdandarynda jumys istedi.
Túrkistan oblysy
