Foto: Astana ákimdigi
«Júktiliktiń 20-aptasynda neırohırýrgııalyq ota jasaý boıynsha shuǵyl túrde sheshim qabyldaý qajet boldy. Qýanyshtysy, ota sátti ótti, kez kelgen sátte jarylýy múmkin «bomba» zalalsyzdandyryldy. Neırohırýrgter júrgizilgen jumystyń nátıjesi oıdaǵydaı ekenin aıtty», dep habarlady «Áleýmettik medısınalyq saqtandyrý qory» KEAQ Astana fılıaly.
24 jastaǵy Almaty qalasynyń turǵynyn osy jyldyń aqpan aıynan bas aýrýy mazalaı bastaǵan. Bir aıdan keıin tipti kórý qabileti nasharlap, oń qabaǵynyń tómen túskenin baıqaıdy. Sóıtip, ol medısınalyq kómek alý úshin oftalmolog pen nevrologqa júgingen.
Bas aýrýy kúsheıe bastaǵan soń mıdyń MRT ótý usynyldy. MRT-da mıdyń oń jaǵyndaǵy artqy arterııasynyń úlken anevrızmasy anyqtaldy, kólemi ulǵaıǵandyqtan janyndaǵy júıke qurylymdaryn qysyp, kez kelgen ýaqytta jarylyp ketý qaýpin týdyrdy. Bul rettegi jaǵdaıdyń kúrdeliligi, júktiliktiń 20-aptasynda neırohırýrgııalyq ota jasaý boıynsha shuǵyl túrde sheshim qabyldaý qajet boldy.
Almaty jáne Astana qalalary neırohırýrgteriniń birlesken talqylaýynan keıin sanıtarııalyq avıasııa jelisi boıynsha pasıent odan ári jedel emdeý úshin Ulttyq neırohırýrgııa ortalyǵyna jetkizildi.
Ulttyq neırohırýrgııa ortalyǵyna jatqyzǵan kezde naýqasty Ana men bala ulttyq ǵylymı ortalyǵynyń anestezıologteri men akýsher-gınekologteri de tekserýge daıyn boldy. Hırýrgııalyq aralasý men atalǵan aýrýdyń qaýiptiligine qaramastan ota jasaý jáne júktilikti saqtap qalý týraly sheshim qabyldandy.
Qýanyshtysy, ota sátti ótti, kez kelgen sátte jarylýy múmkin «bomba» zalalsyzdandyryldy. Neırohırýrgter júrgizilgen jumystyń nátıjesi oıdaǵydaı ekendigin aıtýda. Naýqasty emdeýge anestezıolog-reanımatologter men akýsher-gınekologter de belsendi qatysty.
Otadan keıin, naýqasqa qosymsha zertteýler júrgizgen akýsher-gınekologter qaıta qarap, tekserýden ótkizdi. Jatyrdaǵy sharana men júktilik barysynda eshqandaı patologııalar anyqtalǵan joq. Qazir bolashaq ananyń densaýlyǵy jaqsy jáne úıine shyǵýǵa daıyndalyp jatyr.
Mı tamyrlarynyń anevrızmasyna ota jasaý mamandardyń joǵary biliktiligin jáne zamanaýı medısınalyq jabdyqty qajet etetin eń kúrdeli hırýrgııalyq aralasýlardyń biri bolyp sanalady. Otany Tamyrly jáne fýnksıonaldy neırohırýrgııa bólimshesiniń meńgerýshisi Erbol Mahambetov pen neırohırýrg dáriger Nurtaı Nuraqaı júrgizdi.
Ota naýqasqa tegin, ıaǵnı MÁMS aıasynda kvota arqyly jasaldy. Al mundaı otanyń quny shetel azamattary úshin aqyly negizde shamamen 5 mln teńge bolar edi.
Ulttyq neırohırýrgııa ortalyǵynyń dárigerleri mundaı kúrdeli jaǵdaılar kezinde, qazirgi tańda anany nemese balany, qaısysynyń ómirin saqtap qalý kerek degen suraq týyndamaıtynyn atap ótti. Neırohırýrgııa men anestezıologııadaǵy zamanaýı múmkindikter ana men balanyń ekeýiniń ómirin saqtaýǵa múmkindik beredi.
Atap óteıik, bul Ulttyq neırohırýrgııa ortalyǵynyń dárigerleri ota jasap, júktilik kezinde pasıentterdiń ómirin saqtap qalǵan birinshi jaǵdaı emes.
