Búginde Aqtóbe oblysynda sýdyń tasý qaýpi báseńdedi, biraq jaǵdaı kez kelgen ýaqytta ózgerip ketýi múmkin. Ásirese, aýdandardaǵy bógetter men dambylar tosynnan kelgen tasqynǵa tótep bere almaı jatyr. Sonyń biri – Áıteke bı aýdanyndaǵy «Sherbakov» bógeti men Alǵa aýdanyndaǵy syıymdylyǵy 15,8 mln tekshe metr bolatyn Maǵadjan sý qoımasy. 1985 jyly paıdalanýǵa berilgen Maǵadjan dambysy «Tulpar» JShS-i seriktestiginiń ıeliginde bolyp shyqty. Gıdrotehnıkalyq qurylǵy Alǵa aýdanyndaǵy jeke sharýa qojalyǵynyń sý jınaıtyn bógeti retinde paıdalanylyp, memlekettik qadaǵalaý qyzmetinen tys qalǵany sý qoımasynyń bógeti janynda ornalasqan Besqospa aýylyna qaýip tóngende belgili boldy. Maǵadjan sý qoımasynyń janynda ornalasqan Besqospa aýylynyń 200 turǵyny Ulttyq ulanǵa tıesili «Mı-171E» ushaǵymen Bestamaq aýylyna evakýasııalandy. Maǵadjan qoımasynyń bógetin buzyp ótken qarǵyn sý Besqospa aýylynyń úıleri men aýlasyna kirdi. Qazirgi kezde osy aýyl turǵyndary Bestamaq Mádenıet úıine ýaqytsha ornalastyryldy. Sondaı-aq Bestamaqqa Qyzyltý aýylynan 25 adam, Tabantal qystaǵynan 11 adam kóshirildi.
Áıteke bı aýdanyndaǵy Tereńsaı dambysynyń buzylýynan Áıke aýylyna sý kirdi. Aqtóbe oblysyna kómekke kelgen Qyzylorda oblystyq TJD qyzmetkerleri Áıke aýylynan 188 adamdy úrmeli qaıyqpen Tereńsaı jáne T. Júrgenov aýyldaryna evakýasııalady jáne tikushaqpen sý aıdyndarynyń jaǵdaıyn baqylady. Motopompanyń kómegimen 4 myń tekshe metr sý sorylyp, Tereńsaı bógetindegi sý arnasyn basqa baǵytqa burý jumystary júrgizildi.
