Memleket basshysynyń tapsyrmasyna sáıkes jergilikti aýqymdaǵy tótenshe jaǵdaı rejımi jarııalanǵan 10 oblysta ýákiletti memlekettik organdar saldarlardy joıý jáne azaıtý, jańa aýmaqtardy sý basýǵa jol bermeý boıynsha sharalar qabyldanyp jatyr.
Avarııalyq-qutqarý jumystaryna TJM, IIM, ákimdikter men basqa da qyzmetterdiń 10 myńnan astam qyzmetkeri jumyldyryldy. Eń kúrdeli jaǵdaı – Aqtóbe, Batys Qazaqstan, Qostanaı jáne Atyraý oblystarynda.
«Prokýratýra naqty eldi mekenderdi sý basý, joldardyń, kópirlerdiń, gıdrotehnıkalyq jáne basqa da obektilerdiń qıraý sebepterin belgileıdi. Bıýdjet qarajatynyń maqsatty jumsalýy, sý tasqynynyń aldyn alý jónindegi josparlardyń ýaqtylyǵy men tolyqtyǵy zerttelip jatyr.
Qorytyndysy boıynsha árbir ýákiletti organnyń qyzmetine tıisti quqyqtyq baǵa beriledi», delingen vedomostvo habarlamasynda.
Prokýrorlar Aqtóbe, Almaty jáne Atyraý oblystarynda sotqa deıingi 4 tergep-tekserýdi bastady.
Jergilikti jerlerdegi prokýrorlar quqyq qorǵaý organdarynyń zańdylyq pen quqyqtyq tártip rejımin qamtamasyz etý jónindegi qyzmetin úılestiredi. Problemalyq ýchaskelerdi qorshaý jáne patrýldeý, azamattardyń múlkin qorǵaý qamtamasyz etilgen.
