Qarǵyn sýdyń saldarynan elimizdiń birqatar óńirinde kúrdeli jaǵdaı qalyptasyp otyrǵanyn aıtqan Máýlen Áshimbaev: «Mundaı ahýal keıingi 80 jyldan beri bolmaǵan eń iri tabıǵı apat ekeni aıtylýda. Osyǵan baılanysty Memleket basshysy Qasym-Jomart Toqaev Qazaqstan halqyna úndeýin jarııalap, tasqynnyń saldaryn joıý úshin qabyldanyp jatqan sharalarǵa toqtaldy.
Prezıdent tapsyrmasyna sáıkes Premer-mınıstrdiń basshylyǵymen Respýblıkalyq shtab quryldy. Úkimet músheleri jáne tıisti sala ókilderi apat bolǵan aımaqtarda júr. Qıyn ahýaldy eńserý úshin kúshtik qurylymdar da belsendi atsalysyp jatyr. Barlyq qutqarý jumystary Memleket basshysynyń tikeleı baqylaýynda.
Osy rette Parlament, onyń ishinde Senat depýtattary da óńirlerge baryp, tasqyn sýǵa qarsy is-qımyl jónindegi óńirlik jedel shtabtardyń jumysyna úles qosyp jatqanyn atap ótken jón. Senatorlar apattyń beti qaıtyp, jaǵdaı turaqtalǵansha turǵyndarmen birge bolady.
Memleket basshysy zardap shekken azamattardyń shyǵyndary tolyq óteletinin aıtty. Birde-bir adam eskerýsiz qalmaıdy. Osyǵan oraı memlekettik materıaldyq rezervti paıdalaný tapsyryldy.
Prezıdentimiz atap ótkendeı, aldaǵy ýaqytta apattan tıisti sabaq alyp, qorytyndy shyǵarýymyz kerek. Soǵan sáıkes aldyn alý jumysyndaǵy kemshilikterdi joıyp, ondaı olqylyqtardyń qaıtalanbaýyn qamtamasyz etýimiz qajet.
Osyndaı kúrdeli kezeńde jalǵan aqparatqa boı aldyrmaı, resmı kózder taratqan málimetterge ǵana júginý de asa mańyzdy. Sondaı-aq mundaı jaǵdaıda qoǵamnyń judyryqtaı jumylyp, birlesip áreket etkeni abzal.
Qazirdiń ózinde óńirlerde volonterler men jergilikti turǵyndar óz kúshterimen tasqynǵa tosqyn bolyp jatqanyn bilemiz. О́zge oblystardaǵy azamattar men kásipkerler de belsendilik tanytyp jatyr. Osyndaı bekem birliktiń arqasynda bul qıyndyqty da eńserip shyǵamyz dep tolyq senemiz», dep jazdy.
