Foto: primeminister.kz
Keńeste SQO Tótenshe jaǵdaılar departamentiniń basshysy Erik Sarybaev, «Qazgıdromet» SQOF dırektory Qymbat Merǵalımova, «QazAvtoJol» AQ fılıalynyń dırektory Aqylbek Qabyldın sý tasqynynyń jaǵdaıy týraly baıandady.
Oblysta sý tasqynynan kúrdeli jaǵdaı qalyptasty. Sý deńgeıiniń kúrt kóterilýi qaýipti deńgeıden joǵary bolady degen boljam da bar. Sáýirdiń 5-inen bastap Sergeev sý qoımasy tolyp, arnasynan asty. Petropavl qalasynyń mańyndaǵy sý deńgeıiniń alǵashqy kóterilýi 6 kúnnen keıin bastalyp, al sý tasqynynyń sharyqtaý shegi sáýir aıynyń aıaǵynda bolmaq.
Roman Sklıar sý tasqynynyń keleńsiz ssenarııin boldyrmaý úshin bar kúsh-jigerdi salý kerektigin atap ótti. Atap aıtqanda, sý tasqynynan zardap shekken azamattarǵa barlyq qajetti kómek kórsetýde keshendi sharalardy qolǵa alý qajet. Kómektiń tez arada jáne qaǵazbastylyqsyz kórsetilgeni mańyzdy.
Keńes qorytyndysynda Premer-mınıstrdiń birinshi orynbasary oblys basshylyǵyna turǵyndardy evakýasııalaý pýnktterin daıyndaýdy, azyq-túlik jáne dári-dármekpen qamtamasyz etýdi, turǵyndar arasynda tasqyn kezindegi erejeler boıynsha túsindirý jumystaryn jalǵastyrýdy, qaptardy ınertti materıalmen toltyrýdy, egistikterde erigen sýdyń jınalýyn únemi baqylaýdy, kúshter men quraldardyń táýlik boıy daıyndyǵyn qamtamasyz etýdi, yqtımal sý tasqynyn joıý úshin Sergeev, Shaǵalaly, Sileti sý qoımalarynan sýdyń aǵýyna táýlik boıy monıtorıng júrgizýdi tapsyrdy.
Sonymen qatar Roman Sklıar aımaq basshysy Ǵaýez Nurmuhambetovpen birge Teplıchnoe aýyly men Kojevennyı kentiniń bógetterin, «Qyzyljar Sý» JShS-nyń 1 jáne 2-sorǵy stansalaryn tekserdi. Tekserý barysynda Roman Sklıar qazirgi sý tasqyny jaǵdaıyn eskere otyryp, qoldanystaǵy bógetterdi nyǵaıtý, olardy ulǵaıtý jumystarynyń jáne arnaıy tehnıka men topyraq toltyrylǵan qapshyqtarmen qamtamasyz etý mańyzyn atap ótti.
Qazir oblys ortalyǵynyń turǵyndaryn aýyzsýmen qamtamasyz etip otyrǵan «Qyzyljar Sý» JShS-nyń sorǵy stanssalaryn sý tasqynynan qorǵaý maqsatynda ınjenerlik jumystar júrgizilip jatyr. Jumys qarqyny joǵary jáne sý tasqyny jaǵdaıyna baılanysty rettelip otyr. Petropavl sý torabyn aralaý barysynda Premer-mınıstrdiń birinshi orynbasary sýdyń kelýine az ýaqyt qalǵanyn atap ótti.
«Búgin sý basý qaýpi bar aımaqtardy aralaý barysynda jedel sheshýdi qajet etetin birqatar másele qaraldy. Bul – eń aldymen, sý tasqynyna qarsy is-sharalardy júrgizý úshin tehnıka sanyn kóbeıtý jáne bógetterdi kúsheıtý. Biz ınfraqurylymdy jáne eldi mekenderdi qorǵaý týraly aıtyp otyrmyz. Úlken sýdyń kelýine 7-8 kún qaldy. Qazir Sergeev sý qoımasynda 3 metrden astam sý tasyp jatyr. Tolyp ketý boıynsha antırekord ornatylady dep kútilýde, ol shamamen 4 metrdi quramaq. 2017 jylǵa qaraǵanda áldeqaıda kóp sý keledi. Sondyqtan qazir barlyq kúsh pen resýrsty osy máselelerdi sheshýge baǵyttaý qajet. Oǵan qosa búginde barlyq jol-qurylys kompanııasy ýchaskelerdegi jumysyn ýaqytsha toqtatyp, turǵyndarmen sý tasqynyna qarsy is-sharalardy júrgizetin bolamyz», dedi R.Sklıar.
Eń aýyr jaǵdaı 13 aýdannyń 8-inde tirkelgen, qar jamylǵysy 38-50% aralyǵynda jáne 262 eldi mekende sý basý qaýpi saqtalyp otyr. Oblys joldarynda 48 sý shaıyp ótý tirkeldi. Oblystyq jáne respýblıkalyq mańyzy bar joldarda jol jamylǵysynyń 7 ýchaskesi qoparyldy.
Sýdy tartý jumystary júrgizilýde, 155 shaqyrym aryq tazartyldy, 96,6 shaqyrym kanaldar keńeıtilip, tereńdetildi, topyraq toltyrylǵan 55 myń qap daıyndalyp, onyń 23 myńy tóseldi. 540 adam men 233 tehnıka jumyldyryldy, tirshilikti qamtamasyz etý nysandary qalypty jumys istep jatyr.
О́ńirdegi ahýalmen tanysqan Roman Sklıar jaǵdaıdyń baqylaýda ekenin basa aıtty.
