2024 jyly Qazaqstanda qyzylshadan 75 myń tonnaǵa jýyq qant óndiriledi dep kútilýde. Importtyq quraq shıkizatynan qaıta óńdeý úshin úshinshi elderden shıkizatty bajsyz ákelýge 300 myń tonna kóleminde kvota qoldanysta. Sondaı-aq EAEO elderimen Qazaqstanǵa 270 myń tonna qant jetkizý kelisilgen.
Aýyl sharýashylyǵy vıse-mınıstri Erbol Tasjúrekovtiń aıtýynsha, qyzylshanyń eń kóp kólemi Jambyl, Jetisý jáne Almaty oblystarynda egiledi.
Jambyl oblysynda 400 ga alqapqa qant qyzylshasyn egý jumystary bastaldy, jappaı egý 1-20 mamyr aralyǵynda júrgiziledi.
«Qyzylsha egetin óńirlerdiń ákimdikteri fermerlerdiń tuqymmen tolyq qamtamasyz etilgenin málimdedi. Tehnıka 88%-ǵa daıyn. Jappaı egis jumystarynyń bastalýyna deıin 100% daıyn bolady dep kútilýde», dep baıandady vıse-mınıstr.
Qazaqstanda qant qyzylshasynyń jalpy ónimi ósýde. 2023 jyly bul kórsetkish 67,2% qurap, 2022 jylǵy 305,3 myń tonnadan 510 myń tonnaǵa deıin ósti. 2023 jyldyń qyrkúıeginen jeltoqsanyna deıin qant zaýyttary qyzylshadan 60 myń tonnaǵa jýyq qant óndirdi, bul 2022 jylmen salystyrǵanda 1,8 ese kóp, al shıki quraqtan 155 myń tonna qant (2022 jylǵa qaraı 38%-ǵa az).
2024 jylǵy 1 sáýirdegi jaǵdaı boıynsha zaýyttardaǵy qant qory 33,5 myń tonnany quraıdy (20,5 myń tonna quraq qant, 13 myń tonna qyzylsha qanty). Oǵan qosa 3 myń tonna kóleminde óńdeýge arnalǵan shıkizat bar.
Keńeste Serik Jumanǵarın úsh óńir basshylarynyń egiske daıyndyǵy men qyzylsha egetin alqaptardy ulǵaıtý múmkindikteri týraly esebin tyńdady.
Aýyl sharýashylyǵy mınıstrligine qyzylsha egetin óńirlermen birlese qazirgi jaǵdaıdy eskere otyryp, egis josparlaryn pysyqtaýdy tapsyrdy.
