Vıse-premer Aqtóbe oblysymen shekara aýmaǵyn tikushaqpen aınalyp ótti. Jem ózenindegi zaqymdalǵan bógettiń jaǵdaıyna baǵa berdi. Keshe onyń buzylýy saldarynan Qulsary qalasynyń ekinshi jáne úshinshi ýchaskeleri, sondaı-aq «Jadyrasyn-2», «Bolashaq», «Vahtalyq kent» shaǵyn aýdandary, «Qaraǵaı» eldi mekeni sý astynda qaldy.
6 sáýirdegi jaǵdaı boıynsha Atyraý oblysynyń úsh aýdanynda kúrdeli sý tasqyny jaǵdaıy saqtalýda, 2 eldi mekenge kólikpen qatynaý múmkin emes.
Qulsary qalasynda 2,6 myń jeke turǵyn úı men ákimshilik ǵımarat sý astynda qalyp, 5 sáýirden bastap qaýipti aımaqtan 15 632 adam shyǵaryldy. Halyqty evakýasııalaý jalǵasyp jatyr.
Qazirgi ýaqytta jaǵalaýdy nyǵaıtý jumystary qarqyndy jalǵasýda, topyraq toltyrylǵan 45,9 myń qapshyq, 174,3 myń tonna ınertti materıal tóseldi. 5 sáýirde Kaspıı teńizine qaraı sý ótkizý qabiletin arttyrý úshin Jem ózeninde muz jarý jumystary júrgizildi, taǵy bir ret muz jarý josparlanǵan.
Ákimdik pen kúshtik qurylymdardyń 600-ge jýyq qyzmetkeri, 148 tehnıka, 2 júzý quraly jáne 500 erikti jumyldyryldy.
5 eldi mekende – Mııaly, Jangeldın, Kózdiqara aýyldyq okrýgteri, Aqqora, Jasqaırat aýyldarynda qaýip-qater seıildi.
Qanat Bozymbaev Jylyoı aýdany Qulsary qalasyndaǵy jaǵdaıdyń kúrdeli ekenin aıtyp ótti. Alaıda dúrbeleń men ýaıymdaýǵa sebep joq. О́ńirde sý tasqynymen kúresýge arnalǵan barlyq resýrs bar.
«Jaǵdaıdy turaqtandyrý úshin jergilikti atqarýshy organdarǵa orta eseppen 3-4 kún qajet. Naqty is-qımyl josparyn qurý, qajetti aqsha somasyn bólý, qajetti tehnıkany, sondaı-aq adamı resýrstardy tartý qajet», dedi Q. Bozymbaev.
Vıse-premer óńir basshylyǵyna sý tasqynyna qarsy kúres boıynsha birqatar naqty tapsyrma berdi. Atap aıtqanda, Atyraý oblysynda TJ rejimin engizý týraly tapsyrma berildi.
«Men QTJ basshylyǵyn shaqyrdym, óıtkeni keıbir jerlerde úlken sý kólemin ótkizý úshin temirjoldarǵa demontaj jasaý qajet. Qazirgi tańda Irıklın sý qoımasynan sý aǵyzý sekýndyna 2,5 myń tekshe metrdi quraıdy, aldaǵy ýaqytta ol 4,5 myńǵa jetýi múmkin. Sondyqtan bizde sý tasqynyna daıyndyqqa 20 kún bar. TJ rejimin halyqty dúrbeleńge shaqyrý úshin emes, sý tasqynyna qarsy naqty is-qımyl úshin jarııalaımyz», dedi Q.Bozymbaev.
О́ńirde sýdy Atyraýǵa qaraı jiberip almaı, Kaspıı teńizine qaraı aparatyn ózender men kólderge jiberý úshin burý arnalaryn qazý qajet.
«Biz úshin eń basty mindet – Atyraýdy barlyq jaǵynan nyǵaıtý», dep túıindedi vıse-premer.
