Aqtóbe qalasynyń Áýe qorǵanysy kúshteri men ushqyshtar daıyndaıtyn ınstıtýttyń ushý ekıpajdary jergilikti halyqty evakýasııalaý, mamandardy tasymaldaý jáne gýmanıtarlyq júkterdi jetkizý sharalaryn jalǵastyryp jatyr. Áskerı avıasııa bortymen 50 adam tasymaldandy.
Sý tasqynyna qarsy is-sharalarǵa Soltústik Qazaqstan, Qostanaı oblystarynyń aýmaqtyq qorǵanys brıgadalary jumyldyryldy. Qyzyljar aýdany Teplıchnoe aýlynda áskerı qyzmetshiler bógetti kúsheıtýmen aınalysty. Qostanaıda Tobyl ózeniniń jaǵalaýyn nyǵaıtý jumystary júrgizildi. Qostanaı oblysynyń Arqalyq qalasynan 85 shaqyrym jerde Qyzyl juldyz eldi mekeninde áskerıler ákimdiktiń jedel shtabyna 20 oryndyq armııa shatyryn ornalastyrdy.
Qaraǵandy oblysynda «Astana» óńirlik qolbasshylyǵy 44803, 55524 áskerı bólimderiniń jáne motoatqyshtar brıgadasynyń áskerı qyzmetshileri qum salynǵan qaptardy daıyndap, tóseýmen, sý aıdaýmen, kanaldardy tazalaýmen, úılerdiń aınalasyndaǵy qardy tazalaýmen jáne bógetter aınalasyna úıindiler jasaýmen aınalysty. Jumystar Kóbeteı, Nura, Egindi, Myńbaı, Kertindi eldi mekenderinde júrgizildi.
Oral qalasynda aýmaqtyq qorǵanys brıgadasynyń áskerı qyzmetshileri Báıterek aýdanynyń «Jyraý» saıajaı alabynda 1200 qap qum jáne «Az aýyl» shaǵyn aýdanynda 1300 qap daıyndady.
«Batys» óńirlik qolbasshylyǵy 41433 áskerı bóliminiń áskerı qyzmetshileri Atyraý oblysynyń Qulsary qalasynda Qulsaı ózeniniń jaǵalaýyn kúsheıtýge kómektesti, al Inder aýdanynyń Qarabal aýlynda Oıyl ózeni jaǵalaýyn kúsheıtýge 1500 qap qum tóseldi.
Jalpy, 27 naýryz ben 4 sáýir aralyǵynda Qarýly kúshterden barlyǵy 1255 áskerı qyzmetshi, 69 kólik tehnıkasy, armııa avıasııasynyń 10 tikushaǵy, áskerı-kólik avıasııasynyń 2 ushaǵy jumyldyryldy. Eki myńnan asa adam evakýasııalandy, onyń ishinde 590 bala. 66 tonnadan astam gýmanıtarlyq júk tasymaldanyp, 42 myńnan asa qap qum tóseldi, bir jarym shaqyrym aǵyn sý kárizi tazartyldy.
