Keıingi on kún boıy apatty jaǵdaı týdyrǵan Elek, Jem, Embi, Saǵyz, Yrǵyz, Torǵaı, Qobda, Or ózenderindegi sý deńgeıi qazirgi ýaqytta qalypqa tústi. Qala irgesindegi Qarǵaly, Aqtóbe, Sazdy sý qoımalary qazir lyq tolǵan. Degenmen ótken táýlikte Jaıyq sý basseınine kiretin Qarǵaly ózeniniń Aqtóbe qalasynyń tusyndaǵy bóliginde sý kóterilip, jaǵasyndaǵy úılerge qaýip tóndirgen. Sodan adamdar tún ishinde qaýipsiz jerge kóshirilip, jaǵalaýlar bıiktetildi. Osy aýmaqty tasqynnan qorǵaǵan Ulttyq ulan jaýyngerleri, eriktiler, saıajaı turǵyndarynyń birlesken is-qımyly arqasynda turǵyn úı alabyna sý jaıylǵan joq.
Búginde prokýrorlar sý tasqynynyń aldyn alý jónindegi jumystarǵa bólingen bıýdjet qarjysynyń maqsatty jumsalýyn tekserýge kiristi. Aqtóbe oblystyq prokýratýrasy Áıteke bı aýdanyndaǵy gıdrotehnıkalyq qurylystyń durys júrgizilmeýine baılanysty QK 371-babynyń 1-bóligi (salǵyrttyq áreketter) boıynsha qylmystyq is qozǵady. Bul – 2023 jyly 230 mln teńgege kúrdeli jóndeý júrgizilgen «Sherbakov» bógeti. Tapsyrys berýshi – Aqtóbe oblysynyń tabıǵı resýrstar jáne tabıǵı resýrstardy retteý basqarmasy bolsa, merdiger – «SK Grand kanaly» óndiristik kooperatıvi. 30 naýryz kúni Yrǵyz ózeni arnasynan asqanda, osy bógetti buzyp ketip, Áıteke bı aýdanynyń ortalyǵy T.Júrgenov atyndaǵy aýylǵa qaraı aqty. 78 úıge sý kirdi, 10 úı qırady, 927 adam (215 bala) evakýasııalandy, elektr jáne gazben jabdyqtaý jelileri zaqymdandy. Bylaısha aıtqanda, bóget degenimiz betondalmaǵan, bekitilmegen, qumnan úıilgen bógesin bolyp shyqty.
Tasqyn sýdyń ekpini buzǵan sapasyz gıdrotehnıkalyq qurylystar, qaǵaz júzinde jóndelgen bógetter men kópirler, kólik joldaryndaǵy sý ótkelderi tergep-tekserýge sebep bolyp tur. Aıta ketý kerek, qazirgi kezde Aqtóbe oblysymen aǵatyn ózender boıyndaǵy 206 gıdrotehnıkalyq qurylǵy ábden tozǵan. 5 sáýirde Hromtaý aýdanyndaǵy Maǵadjan sý qoımasynyń bógeti jarylyp, Besqospa aýylyn sý basý qaýpi tóndi. Jedel áreket etý arqyly Ulttyq ulanǵa qarasty Mı-171E tikushaǵymen Besqospadan Bestamaq aýylyna 174 adam evakýasııalandy.
Qazirgi kezde úıleri sý basqan 1 500 adam ýaqytsha ornalastyrylǵan jerlerde turyp jatyr. Sý tasqynynan zardap shekkenderge kómek kórsetý jónindegi komıssııa árbir úıdi aralap, keltirilgen shyǵyn kólemin esepke alýǵa kiristi. Turǵyndar birtindep úılerine oralyp jatyr.
Aqtóbe oblysy
