2024 jyldyń 4-5 sáýirinde Aqtaý qalasyndaǵy «Grand Nur Plaza» qonaq úıiniń májilis zalynda QR Mádenıet jáne aqparat mınıstrliginiń Din isteri komıtetiniń qoldaýymen «Rýhanı jańǵyrý» qoǵamdyq qorynyń uıymdastyrýymen din máseleri boıynsha bilikti mamandardy daıyndaýǵa baǵyttalǵan is-shara ótti. Oǵan «Din zertteý ortalyǵynyń», meshitterdiń, orta jáne joǵary oqý oryndarynyń jáne t.b mamandary, ımamdary, psıhologtary men teologtary qatysty. Jıynda din máseleleri boıynsha túsindirý tobynyń músheleri – psıhologııa jáne pedagogıka mamany Týıǵanov Myrzabek Sardarbekuly jáne dintanýshy, teolog Ospanov Dálelhan Qonyrbaıuly semınar oqydy.
Myrzabek Týıǵanov «Destrýktıvti dinı ıdeologııalarǵa qarsy turýdaǵy dáleldeý ádisteri» taqyryby aıasynda qatysýshylarǵa destrýktıvti dinı aǵym jeteginde ketken otbasylarmen áńgime júrgizý, baılanys ornatý jáne ózin-ózi ustaý joldaryn túsindirdi. Sondaı-aq «Jastardy destrýktıvti dinı uıymdarǵa tartýdyń aldyn alý nysandary men ádisteri» taqyrybymen jazasyn óteýshilerdiń arasynda tárbıe jáne áleýmettik jumys júrgizý, psıhologııalyq beınesin anyqtaý jáne jaǵdaıdyń kúrdelenýine jol bermeý tásilderi týraly sóz qozǵady.
Dálelhan Ospanov «Rýhanı adamgershilik qundylyqtardy ıdeologııaǵa aınaldyrý» taqyryby aıasynda qatysýshylarǵa ıslam dinindegi kúrdeli problemalar men asqynyp turǵan máselelerdi túsindire otyra, ıslam áleminiń birligi jolynda turǵan negizgi kedergiler jáne onymen kúres joly týraly aıta ketti. Sondaı-aq «Dinı ekstremızniń aldyn alý jáne ońaltý jumystary» taqyrybymen mamandarǵa jumys barysynda jaǵdaıdyń kúrdelenýine jol bermeý tásilderi men ońaltý qaǵıdalary týraly aqparat berdi.
Sonymen qatar semınarlar men trenıngter barysynda qatysýshylar tarapynan dáriskerlerge suraqtar qoıylyp, mándi jaýaptar alyndy.
