Foto: Aqorda baspasóz qyzmeti
Prezıdentke ónerkásiptik damý, geologııa, jer qoınaýyn paıdalaný jáne qurylys salalaryndaǵy jumystyń nátıjesi men aldaǵy kezeńge arnalǵan jospary jóninde baıandaldy.
Mınıstr bıylǵy qańtar-aqpan aılarynda Qazaqstannyń óńdeý ónerkásibindegi ósim 7,4 paıyzdy quraǵanyn jetkizdi. О́ndiris kólemin ulǵaıtýda mashına jasaý, metallýrgııa, hımııa jáne jeńil ónerkásip sııaqty salalardyń úlesi zor. Jalpy quny 1,5 trıllıon teńge bolatyn 180 jobany júzege asyrý josparlanǵan. Sonyń arqasynda 17,8 myń jumys orny ashylmaq.
Memleket basshysyna qurylys salasynyń jaı-kúıi týraly málimet berildi. Byltyr 157 myń turǵyn úı salynǵan. Bıyl 172 myń turǵyn úı salý kózdelip otyr. Sondaı-aq jalǵa beriletin 22 myń turǵyn úıdiń qurylysyna memleketten 300 mıllıard teńgeden astam qarjy bólingen. «Otbasy banki» arqyly qarjylandyrý kólemi 300 mıllıard teńgeni quraıtyn baǵdarlama iske qosylady. Bul el azamattaryna 12 myń ıpotekalyq zaım berýge septigin tıgizedi.
Qasym-Jomart Toqaevqa jer qoınaýyn paıdalaný quqyǵyn berýge qatysty aýksıondardy elektrondy formatta ótkizý úshin E-Qazyna.kz sıfrlyq platformasynyń iske qosylǵany jaıynda baıandaldy. Bul bastama prosestiń ashyqtyǵy men qoljetimdiligin edáýir arttyrdy. Aýksıondarǵa Rio Tinto jáne Fortescue sııaqty álemdik iri kompanııalardyń qatysýy Qazaqstannyń resýrstarǵa baı ken oryndaryn zertteýge múmkindik beretin básekeniń arta túskenin kórsetedi.
Prezıdentke mınıstrliktiń sý tasqynynan zardap shekken turǵyndarǵa kómek kórsetý jónindegi negizgi jospary tanystyryldy. Qazirgi ýaqytta sý basqan óńirlerde jańa turǵyn úı salý úshin jobalyq-smetalyq qujattamanyń qunyn bekitý jumystary aıaqtalyp keledi.
Qasym-Jomart Toqaev apattan qıraǵan turǵyn úılerdi tez arada qalpyna keltirýdi tapsyrdy.
