Shtabtyń kóshpeli otyrysy

Sý tasqyny jaǵdaıy turaqtalǵansha óńirlerge jiberilgen vıse-premerlerdiń sý tasqynyna baılanysty qazirgi ahýal týraly baıandamalary tyńdaldy. Búgingi tańda 10 oblysta: Aqmola, Aqtóbe, Atyraý, Qaraǵandy, Qostanaı, Pavlodar, Batys Qazaqstan, Soltústik Qazaqstan, sondaı-aq Abaı jáne Ulytaý oblystarynda TJ rejimi saqtalyp otyr. Qazir jalpy elimiz boıynsha 15%, soltústik, shyǵys jáne ortalyq óńirlerde shamamen 40% aýmaqty qar basyp jatyr.

Avarııalyq-qutqarý jumystaryna 12 myńnan astam adam, 800-den astam tehnıka, 400-ge jýyq sý aıdaý jáne júzý quraly jumyldyryldy. TJ aımaqtarynan 70 myńnan astam adam evakýasııalandy.

Sonymen qatar otyrysta Aýyl sharýa­shylyǵy mınıstrliginiń aqparaty tyńdaldy. Qabyldanǵan sharalardyń ná­tı­jesinde sý basqan óńirlerde 60 myńnan astam mal basy qaýipsiz ýchas­kelerge kóshirildi. Oǵan qosa sý basqan aımaqtarda epızootııalyq jaǵdaıdyń nasharlaýyna jol bermeý úshin mınıstrliktiń Respýb­lıka­lyq epızootııaǵa qarsy jasaǵy oblys ákimdikterimen birlesip janýarlardyń ólekselerin jınaý jáne joıý jumystaryn júrgizip jatyr. Búgingi tańda 1 013 bas, onyń ishinde 133 IQM, 809 usaq mal basy, 64 jylqynyń óleksesi joıyldy.

«Sý tasqynyna qatysty jaǵdaı óte kúrdeli. Prezıdent sý basqan aýmaqtarda quqyqtyq tártipti qamtamasyz etý mindetin qoıdy. Qalalar men aýyldardyń tynys-tirshiligin tıisti deńgeıde qamtamasyz etý qajet. Turǵyndardy kerekti nárselerdiń bar­lyǵymen qamtý kerek. Baqylaýdy kúsheı­tip, azyq-túlik baǵasynyń negizsiz ósý­ine jol bermeýdi tapsyramyn. Ondaı fakti­lerdiń jolyn kesý kerek. Qazir birqa­tar óńirde zalaldy óteý jáne ótema­qy tóleý jumystary bastaldy. Bul jumys­ty bıýrokratııaǵa salmaı, jedel túrde múm­kin­diginshe ashyq júrgizý kerek. Eshkim kómeksiz qalmaýy kerek. Ákimder jaǵdaıdy erekshe baqylaýda ustasyn. Kommýnaldyq kásiporyndar men sanıtarlyq-epı­de­mıo­logııalyq qyzmetter kúsheıtilgen ju­mys rejimine kóshirildi. Halyqqa barlyq qajetti qyzmetterdi sapaly jáne úzdiksiz negizde kórsetý qajet», dedi O.Bektenov.

Premer-mınıstr, Shtab jetekshisi Oljas Bektenov kelesideı tapsyrmalar berdi:

- Densaýlyq saqtaý mınıstrligi sý bas­qan aımaqtardaǵy sanıtarlyq-epıde­mıo­logııalyq jaǵdaıdy, atap aıtqanda, aýyzsýdyń sapasyn baqylaýdy kúsheıtýi kerek;

- Aýyl sharýashylyǵy mınıstrligi epızootııalyq jaǵdaıdyń nasharlaýyna jol bermeı, úı jáne jabaıy janýarlarǵa qajetti veterınarlyq baqylaýdy qamta­masyz etýge tıis;

- Ishki ister mınıstrligi evakýa­sııalanǵan halyqtyń múlkiniń saqtalýyn qamtamasyz etý jóninde sharalar qabyldaýy qajet;

- ákimdikter evakýasııalyq pýnkt­terdegi halyqty qajetti zattardyń barlyǵymen qamtamasyz etip, sondaı-aq qalpyna keltirý jumystary kezeńinde olardy ýaqytsha ornalastyrý máselesin pysyqtaýy qajet.

Jumys jalǵasýda. Eldegi sý tasqyny jaǵdaıy – Shtabtyń turaqty baqylaýynda.