Foto: primeminister.kz
Aqtóbe jáne Sazdy sý qoımalarynda sý aǵyzýdyń ońtaıly tranzıttik rejimin engizý arqasynda sý tolyp ketý qaýpi joq. Qarǵaly sý qoımasyndaǵy kelip jatqan sý kólemi joǵary kúıinde qalyp otyr. Munda bir apta ishinde sý tolýynyń aldyn alý úshin ony aǵyzý qolmen rettelip keledi. Jobalyq syıymdylyǵy 280 mln tekshe metr bolatyn Qarǵaly sý qoımasynyń tolý deńgeıi búginde – 270 mln m3 nemese 97%. Jasandy retteý rejiminiń nátıjesinde 350 m3/s jyldamdyqpen sý kelýi kezinde 350 m3/s jyldamdyqpen sý aǵyzý jumystary júrgizilip jatyr. Qazgıdromettiń boljamynsha, kelip túsken sý kólemi azaıa bastady.
«6 sáýirden 7-ne qaraǵan túni Qarǵaly jaǵalaýyna jaqyn ornalasqan jáne sý basý qaýpi tóngen qala shetindegi úılerdiń turǵyndaryn jappaı shuǵyl evakýasııalaý júrgizildi, 127 adam qaýipsiz jerge kóshirildi», dedi S.Jumanǵarın.
Sý tasqyny saldarynan Aqtóbe oblysynda 1 053 turǵyn úı (Aqtóbe qalasynda – 135, aýdandarda – 918), 46 ǵımarat pen qurylys (Aqtóbede – 9, Qobdada – 10, Oıylda – 22, Muǵaljarda – 4, Temirde – 1), 232 aýla men 689 saıajaı úıi sý astynda qaldy. 17 eldi mekenmen jol qatynasy buzyldy.
О́ńirde barlyǵy 15 myń adamǵa arnalǵan 86 ýaqytsha qabyldaý pýnkti daıyndaldy. 10 myńǵa jýyq adam, onyń ishinde 4 myńnan astam bala evakýasııalandy. 10 663 janýar qaýipsiz aımaqqa kóshirildi.
Búgingi tańda oblystyń turaqtandyrý qorynda áleýmettik mańyzy bar azyq-túlik (kartop, kókónister, kúrish, qaraqumyq jarmasy, qant, ósimdik maıy, un) mólsheri jetkilikti. Osy kólem Aqtóbe men tótenshe jaǵdaı rejimi engizilgen aýdandardy keminde 1,5 aıǵa qamtamasyz etýge jetedi.
Jalpy oblysta 94 zardap shekken turǵynǵa 28 mln teńge kóleminde birjolǵy áleýmettik tólemder tólendi. Jalpy 7 sáýirdegi jaǵdaı boıynsha birjolǵy tólemdi alýǵa 346 otbasy nıet bildirgen.
Tasqynnan zardap shekken turǵyndar men kásipkerlerdiń materıaldyq zalaldaryn esepteý úshin Aqtóbe oblysynyń ár aýdanynda jeke komıssııalar quryldy. 7 sáýirdegi jaǵdaı boıynsha 2 018 ótinish túsip, komıssııa músheleri zalaldy baǵalaý úshin Aqtóbe qalasy men Áıteke bı, Qobda, Muǵaljar, Temir aýdandarynda 1 482 úıdi aralaǵan. Oıyl aýdanynda sý deńgeıiniń tómendemeýi sebebinen múlikti baǵalaý jumystaryn júrgizý múmkin bolmaı otyr. Keltirilgen zalaldyń tólemderi táýelsiz baǵalaý kompanııasynyń qorytyndysymen júrgiziledi. Tirkelmegen múlikti, kóbine baý-baqsha sharýashylyǵyn baǵalaý úshin bólek mehanızm ázirlenedi.
Aqtóbe oblysynda sý tasqynynan zardap shekkenderge arnalǵan gýmanıtarlyq kómek jınaý ortalyǵy jumys isteıdi. Barlyǵy 10 kún ishinde shamamen 300 tonna (210 tonna azyq-túlik, 80 tonna azyq-túlikke jatpaıtyn taýarlar, 0,2 tonna dári-dármek) jınaldy. Onyń ishinde 215 tonna taýar muqtaj turǵyndarǵa taratyldy. Gýmanıtarlyq kómekti zardap shekken aýdandarǵa jetkizýge 8 524 erikti kómektesip jatyr.
