Túrkistan oblysynyń Maqtaaral aýdanyna qarasty Bereke aýylynda ómirge kelgen Shahrýhqoja mektepte bilim ala júrip, buǵanasy qatqan sátten bastap maqta alqabynda jumys isteıdi. Sondaı kúnderdiń birinde onyń qolyna áskerge shaqyrý qaǵazy tıedi. Kópke sozbaı áskerı komıssarıatqa barady. Biraq áskerge alynýǵa áli jasy jetpegen. Birneshe kún erte shaqyryp qoıǵan, amal joq, keri qaıtady. Áskerge baramyn dep bel býǵan jas jigittiń ekinshi talpynysy da sátsiz aıaqtalady. Tek úshinshi márte kelgende ǵana joly bolyp, Taldyqorǵan qalasyndaǵy Ulttyq ulannyń 5514 áskerı bóliminiń 3-rotasyna qosylady. Osylaısha, «ásker atanyp, eldi qorǵaımyn» degen bala armany oryndalǵan ol: «Mektep qabyrǵasynda armanymyz jaıly shyǵarma jazǵan kezde únemi áskerı adam bolǵym keletinin qaǵazǵa túsirýshi edim. Oqýshy kúnimnen sportqa kóbirek qyzyqtym», deıdi.
Otan aldyndaǵy boryshyn abyroımen atqaryp shyqty. Qyzmet barysynda erlik áreketterimen de kózge túsken jaýynger ýaqyt óte óz isine muqııat, sharýaǵa tııanaqty qaraıtyn maman bolyp qalyptasa bastady.
– 9-synyp oqyp júrgende úı sala bastadyq. Sol kezde otbasymyz qarajat jaǵynan qınaldy. Sondyqtan úıdegi tórt adam bir kúndik jumysqa jaldanatynbyz. Aqshaǵa júgeri alqabynda jumys isteýimizge týra keldi. Úıimizdiń sharýasy turalap qaldy. Aǵam oqýǵa tússe, oǵan da aqsha kerek. Áne-mine degenshe men de oqý bitiretin ýaqyt taıap qaldy. Sonda anamyz: «Bul – Qudaıdyń bizge bergen synaǵy. Alla synaqty kótere alatyn quldaryna ǵana beredi. Jaqsylyqtan úmit úzbeıik, balam», dep jubatatyn. Sol sózine sendik. Adal jumys istedik. Adaldyq degennen shyǵady, birde jumys berýshimiz óz aıaǵymen úıge izdep kelip, kelisken 20 myń teńgeniń ornyna 40 myń teńge ustatty. Ákem: «О́z eńbegimizge saı qarajatty berińiz, qalǵanyn ala almaımyn», dep artyq aqshany jumys berýshige qaıtaryp berdi. Sol azyn-aýlaq aqshanyń ózi qyjalatymyzdy ótedi. Áke-sheshemizdiń janashyrlyǵyn sezinip, adal tárbıesin boıymyzǵa sińirip óstik. Olardyń bergen eńbekqorlyq pen ádildik qasıeti áskerde qajetime jarady», deıdi ótken kúnderdi eske alǵan Shahrýhqoja Shermatjanuly.
Sapqa turyp, sarbaz atanǵan soń Taldyqorǵan qalasyndaǵy 5514 áskerı bóliminde sportpen shuǵyldanýǵa múmkindik týdy. Nátıjesi de jaman bolǵan joq. Áskerı bólimdegi sporttyq jarystarda top jarǵan kezderi kóp. Sporttaǵy jetistikteri kóbeıe bastady. «Áskerden keterimde aǵa leıtenant bolyp júrgen rota komandıri Kereı Erjan bizden kelisimshart boıynsha qyzmet etýge nıettiler bar-joǵyn surady. Birden qalǵym keletinin aıttym. 5514 áskerı bóliminde jumys istegim kelgen. Biraq ol jerde qyzmet etý baqyty buıyrmady. Meni Zarechnyı kentindegi áskerı bólimge baǵyttap jiberdi. 3660 áskerı bólimine kelgende RHBZ rotasynyń bólinis basshysy, kólik basshysy laýazymyna taǵaıyndaldym. Birneshe aıdan keıin batalon serjanty, aǵa serjant Yhtııar Jalalov bólimshe komandıri bolyp qyzmet etýdi usyndy. Sodan soń Qarakemerge oqýǵa jiberdi. 2 aıdan keıin oqýymdy oıdaǵydaı aıaqtap keldim», deıdi bólimshe komandıri.
Búginde onyń ózi ǵana emes, otbasy músheleriniń de armany oryndalyp, árkim ózi qalaǵan salada jumys istep jatyr. Aǵasy aǵylshyn tili pániniń muǵalimi, alys-jaqyn kúnderi shetelge shyǵý úshin vızasyn kútip júr. Inisi Jetisaıdaǵy medısınalyq kolledjde bilim alyp keledi. О́zi de bolashaqta arnaıy jasaq qataryna qosylýdy maqsat etkendikten, daıyndyǵyn shyńdap, josparynyń júzege asýyn taǵatsyzdana kútip júr.
