Astanada Ulttyq mýzeıdiń 10 jyldyǵyna oraı «Dala keskindemesi: rámizder, boıaýlar, beıneler» atty kórmeniń ashylý saltanaty ótti. Mereıtoılyq kórmede mýzeı qorynda 10 jyl boıy jınaqtalǵan beıneleý óneriniń jaýharlary usynylǵan. Olardyń qatarynda Ábilhan Qasteev, Áýbákir Ysmaıylov, Oral Tańsyqbaev, Salıhıtdın Aıtbaev, Úki Ájıev, Aısha Ǵalymbaeva, Gúlfaırýs Ysmaıylova, Kamıl Mýllashev, Amandos Aqanaev, Erbolat Tólepbaı, Alpysbaı Qazyǵulov, Aǵymsaly Dúzelhanov syndy belgili qylqalam sheberleriniń týyndylary bar. Kórmege kelgen qonaqtar barlyǵy 50 avtordyń 250 týyndysymen tanysýǵa múmkindik aldy. Sharada ańyzǵa aınalǵan týyndylarmen qatar talantty jas avtorlardyń zamanaýı dúnıeleri usynylǵan. Sonymen qatar dástúrli qolóner, zergerlik jáne toqymashylyq óner buıymdary, mýzykalyq aspaptar kórermenge kórsetildi.
– Búgingi kórme – Ulttyq mýzeıdiń 10 jyldyq mereıtoıy aıasynda táýelsiz sarapshylardyń qatysýymen uıymdastyrylyp otyrǵan alǵashqy kýratorlyq joba. Maqsatymyz – kelýshilerdi qazaq keskindemesiniń tarıhy men onyń damý jolymen tanystyryp qana qoımaı, álemdik ónerdegi ózindik ornyn kórsetý. Qazaq beıneleý óneriniń tarıhy tereń, mýzeıde bir ǵasyrdan astam ýaqyt saqtalyp turǵan sýretterimiz de bar. Sondaı-aq 2022-2023 jyldary bul qordy jas sýretshilerdiń jumystarymen tolyqtyrdyq. Bıyl on jyldyqqa baılanysty jyl sońyna deıin ártúrli kórme uıymdastyrý josparda bar, onyń ishine otandyq kórmelermen qatar halyqaralyq kórmeler de kiredi. Búginde Ulttyq mýzeıde 20-ǵa tarta kolleksııa, 200 myńnan astam jádiger saqtaýly. Olardyń barlyǵyn, árıne, ekspozısııaǵa kórsetý múmkin emes. Osyndaı kórmeler arqyly bolashaqta qala turǵyndary men qonaqtar nazaryna usynyp otyratyn bolamyz, – deıdi Ulttyq mýzeı dırektorynyń mindetin atqarýshy Aıbek Sydyqov.
Is-shara barysy «Qazaq keskindemesindegi tarıhı sıýjetter», «Tabıǵat beıneleri – alýan túrli peızajdyq motıvter», «Qazaqstan ónerindegi sýretshi áıelder», «Qazirgi zamanǵy óner – jańa esimder» sııaqty taqyryptyq aımaqtarǵa bólingen. Kórme kýratory, Temirbek Júrgenov atyndaǵy Qazaq ulttyq óner akademııasynyń óner teorııasy men tarıhynyń oqytýshysy, elimizdiń sýret óneri týraly birneshe kitaptyń avtory Olga Batýrına kórermenderge týyndylar tarıhy jóninde qundy maǵulmattarmen bólisti.
– Sýretshiler neǵurlym talantty bolǵan saıyn dúnıeniń jarqyn kórinisin soǵurlym tereń kóre bastaıdy. Máselen, myna sýrettegi Abram Cherkasskıı – aldymen Qazaqstanǵa jer aýdarylyp, búkil ómiri elimizben tikeleı baılanysqan sýretshi. Ol Almatyǵa kelgende qalada alǵashqy sýretshiler ýchılıshesi ashylady. Cherkasskıı sonda oqytýshy bolyp, búgingi biz tanıtyn kóptegen korıfeılerdi uıasynan qanat qaqtyrdy. Solardyń ishinde Sabyr Mámbeev syndy áıgili sýretshi bar. Bilgenge, Qazaqstan tek dala men taýlardan turmaıdy. Mine, Mıhaıl Shatalovtyń myna bir sýretinde aspanmen astasqan teńizdiń, qustar men záýlim keńistiktiń beınesi kelisti kórinis tapqan, – dedi kýrator.
Kórmege qoıylǵan sýrtterde eldik rýhty kóteretin ulttyq naqyshtar, salqar dala, sabylǵan kósh, shurqyraǵan jylqylar beınesi jıi kórinis tapqan. Uly dalanyń kerbezdigi men keńdigi beınelengen týyndylar arqyly ult ómiriniń kórkem shejiresine qııal qanatymen erkin saparlaýǵa bolady.
