Jıyn barysynda sý tasqyny kezindegi qazirgi ahýal jáne tabıǵı apattyń aldyn alýǵa jáne joıýǵa baǵyttalǵan sharalar talqylandy.
Qor tabıǵı apattan eń kóp zardap shekken óńirlerge – 15 mlrd teńge kóleminde materıaldyq kómek kórsetedi, dep atap ótti Nurlan Jaqypov. Qordyń korporatıvtik ortalyǵy, QMG, «Qazatoprom», QTJ, «Qazaqgaz», KEGOC, «Qazaqtelekom», «Eır Astana», «Samuryq-Energo» kómek kórsetýde.
Qarajat qaıyrymdylyq qyzmetiniń biryńǵaı operatory «Samruk-Kazyna Trust» arqyly baǵyttalady.
Qazirgideı qıyn jaǵdaıda qyzmetkerlerdiń qaýipsizdigin, tıisti qural-jabdyqtarmen qamtamasyz etý portfeldik kompanııalardyń aldynda turǵan basym mindetterdiń biri. Syn saǵatta kúshimizdi biriktirip, TJ-ge qarsy kúresý jumystaryn jandandyrý qajetpiz. Osy baǵyttaǵy tasqyn sýdyń aldyn alý jumystaryn, sondaı-aq zardap shekken óndiristik obektilerdiń jumysyn shtattyq rejımge keltirý sharalaryn jalǵastyrý qajet, - dedi Nurlan Jaqypov.
QMG Basqarma tóraǵasy Maǵzum Myrzaǵalıevtyń aıtýynsha, QMG kompanııalar tobynan sý tasqynyna qarsy sharalarǵa 500-den astam qyzmetker jumyldyrylǵan jáne 160-tan astam tehnıka men qural-jabdyq, sondaı-aq 80 tonna dızel, 22 tonna benzın bólingen.
«Qazaqstan temir joly» AQ-da sýǵa tótep beretin 45 poıyz quryldy. Tasqyn sýdan zardap shekken barlyq óńirlerde sý aıdaıtyn 47 órt sóndirý poıyzy kezekshilik etýde, - dep atap ótti jıynda QTJ basshysy Nurlan Saýranbaev. Sondaı-aq, temirjol transporty azamattardy evakýasııalaýǵa tartylǵan. Sáýirdiń 8 kúni QTJ qarajaty esebinen Atyraý oblysynda tańerteńnen beri 5 myńǵa jýyq qazaqstandyq tasymaldandy.
QazaqGaz-da avarııalyq-qutqarý jáne sý tasqynyna qarsy jumystarǵa 750 adam jumyldyryldy, sý tasqyny zardaptaryn joıý jumystaryna 135 birlik tehnıka bólingen, sý basý óńirlerinde eriktiler toptary quryldy.
«KEGOC» AQ elektr jetkizý jelilerin, ǵımarattar men qurylystardy aǵyn sýdan qorǵaý sharalaryn qabyldady, sondaı-aq sý basýy yqtımal áýe jelilerin baqylaý jumystary jáne elektr jelilerinde avarııalyq-qalpyna keltirý jumystaryn júrgizý úshin brıgadalar uıymdastyryldy, - dep atap ótti Nábı Aıtjanov.
«Qazaqtelekom» AQ-da telekommýnıkasııa quraldarynyń úzdiksiz jumysyn qamtamasyz etý úshin kompanııanyń tehnıkalyq blogy jedel shtabtar qurdy. Bólimsheler arasynda baılanys ortalyqtary uıymdastyrylyp, avarııalyq-qalpyna keltirý komandalary quryldy. Qyzmetkerler sý tasqyny saldarynan zaqymdalǵan jabdyqtardyń aqaýlaryn tez arada joıýda.
Qor tobynyń qyzmetkerleri zardap shekken otbasylarǵa azyq-túlik, turmystyq zattar jáne basqa da kómek kórsetedi.
Nurlan Jaqypov sý tasqyny kezindegi ahýaldy táýligine birneshe ret habarlap otyrýdy jáne tótenshe jaǵdaıdy baqylaýda ustaýdy tapsyrdy, sondaı-aq apat zardaptaryn joıýǵa qatysqan barlyq top qyzmetkerlerine alǵysyn bildirdi.
