Apat bastalǵaly aýyldastarymen birge júrgen Ádil Jubanovtyń aıtýynsha, Jylyoı, Qyzylqoǵa aýdandary sýǵa ketken. Qazirgi tańda jergilikti bılik, jeke kásiporyndar men qarýly kúshterdiń resýrstary jumyldyrylyp, oblystyq, aýdandyq shtabtar jumys istep jatyr.
– Ondaǵan jyl boıy kelmegen sý. Sondyqtan jerler jeke qojalyqtarǵa ótip, tabıǵı arnalary jabylyp qalǵan. Odan bólek teńizden tasymaldanatyn munaı qubyrlary tartylǵan. Solardyń bári sýdyń tabıǵı jolmen ketýine kedergi bolyp otyr. Endigi maqsat – Reseıden keletin alapat sýdan Atyraý qalasyn aman alyp qalý. Jaıyqtyń boıyndaǵy Inder, Mahambet aýdandarynda bógetter salý, bekitý jumystary qarqyndy júrip jatyr, – dedi Á.Jubanov.
Sapar barysynda depýtattar belsendiler turǵyzyp jatqan Sokolok kanalymen, qala ishindegi uzyndyǵy 20 shaqyrym bolatyn bógettiń jumysymen tanysty. Mahambet aýdany ákiminiń aıtýynsha, aýdannyń 21 eldi mekeniniń 17-si Jaıyq ózeni jaǵalaýynda ornalasqan. 85 shaqyrym eski bógettiń orny bar, endi taǵy qosymsha 15 shaqyrym bóget salynyp jatyr. Jalpy alǵanda bógettiń uzyndyǵy 100 shaqyrymdy quraıdy.
Májilis depýtaty Edil Jańbyrshınniń aıtýynsha, aýylǵa sý kirmes úshin bógettermen qorshap, dári-dármek, azyq-túlik pen janar-jaǵar maıdyń qoryn jasap alý kerek.
Májilis depýtaty Rınat Zaıtov sý tasqynynan keıingi eldiń jaǵdaıyn bilý úshin Aqsýat aýdanyna bardy. Aýdan ákimi Ashat Smaılov tasqyn saldarynan búlingen Boǵas ózenindegi kópirdi, oblystyq mańyzy bar «Sátbaev-Aqsýat» jolyn kórsetip, qalpyna keltirý jumystary týraly aıtyp berdi.
Boǵas ózeni deńgeıiniń tasyp kóterilýinen Aqsýattan Kindikti aýylyna aparatyn kópirdi sý shaıyp, aýdan ortalyǵymen ýaqytsha jol qatynasy úzilgen. Alaıda jergilikti atqarýshy bılik jaǵdaıdy jedel retke keltirýge kiristi.
О́ńirlerge sapar aıasynda Aına Mysyrálimova men Dáýlet Muqaev Aqmola oblysynyń birneshe aýdanyn aralady. Arshaly aýdany Jibek joly aýylynyń irgesindegi Nura ózeniniń tasýyna baılanysty qazir aýyldaǵy jaǵdaı kúrdeli. Ár eki saǵat saıyn sýdyń deńgeıi ólshenip otyr. 35 myń qum salynǵan qaptan bóget turǵyzylyp, 50 arnaıy tehnıka jumyldyrylǵan. Depýtattar odan ári Selınograd aýdany Talapker aýylyna baryp, ondaǵy jaǵdaımen tanysty. Birneshe kún buryn aýlalardy sý basqanymen, qazirgi jaǵdaı turaqty. Aýyl irgesin bekitý jumystary qolǵa alynǵan.
Al Qazybek Álishev pen Asqar Sadyqov Aqtóbe oblysynyń Qumsaı aýyly turǵyndarymen júzdesti. Sarkól aýyldyq okrýginiń Qumsaı aýylyndaǵy 39 úıdi, 1 sharýa qojalyǵy men 1 kásipkerlik nysandy sý basqan. Qazirgi ýaqytta aýyldaǵy 27 úı turýǵa jaramsyz.
Májilis depýtattary turǵyndardyń ótinish-tilekterin tyńdady. Halyq malyn tastap kete almaıtynyn aıtyp, jańadan úı salynyp bitkenshe jyly vagon surady. Qazir aýylǵa vagondar jetkizilip, elektr jelisine qosylǵan. Aqtóbedegi eki sý qoımasynyń tolyp ketý qaýpi seıildi. Zardap shekkenderge 300 tonnaǵa jýyq kómek jınaldy. 206 adamǵa 64 mln teńge kóleminde birjolǵy áleýmettik tólem jasalǵan. 11 eldi mekenmen aradaǵy úzilgen jol qatynasyn qalpyna keltirý jumystary júrgizilip jatyr.
