Qazaqstan musylmandary dinı basqarmasy bergen málimetke qaraǵanda, keshe Astana qalasynan Qulsary qalasyna qaraı taǵy 2 fýra kómek attanypty. Al osy kúnderi bas múftı Naýryzbaı qajy Taǵanuly Qostanaı oblysynda sý basqan eldi mekenderdiń halqymen kezdesip júr. Keshe jumys saparymen atalǵan óńirge barǵan QMDB tóraǵasy múftııat janyndaǵy «Zeket jáne qaıyrymdylyq» qorynyń eriktiler tobymen júzdesip, nasıhat aıtty.
«On adam júrgen jerde iz qalady, myń adam júrgen jerde jol qalady» degen qanatty sóz bar. Sizder izgi isterge iz ben jol qaldyryp júrgen qaıyrymdy jansyzdar. «Qaıyrymdylyq jasasań – qaıyryn óziń kóresiń» demekshi, jaqsylyq jasaý – qanymyzǵa sińgen qasıettiń biri. Qazir naǵyz halyqqa kómektesetin sát. El basyna kún týǵanda barshamyz birligimizdi tanytyp, árdaıym halyqtyń janynan tabylýymyz kerek», dedi Naýryzbaı qajy Taǵanuly.
Búginde «Zeket jáne qaıyrymdylyq» qorynyń Qostanaı oblysyndaǵy 400-ge tarta eriktisi ortaq iske jumyldyrylǵan. Keshe bas múftı atalǵan qor tarapynan uıymdastyrylǵan qaıyrymdylyq is-sharasyna qatysty. Sý tasqynynan zardap shekken 300 otbasyna áleýmettik mańyzy bar azyq-túlik sebetteri taratylǵan jıynda ol «Paıǵambarymyzdyń (s.ǵ.s.) kúlli adamzatqa ósıet retinde joldaǵan «Adamdardyń eń jaqsysy – adamdarǵa paıdaly bolǵandary», degen hadısin mysalǵa keltirdi. Sonymen birge Naýryzbaı qajy Taǵanuly Qostanaı aýdanynda tasqyn sýdan zardap shekken turǵyndarmen kezdesip, jubanysh sózderin aıtty. «Sabyrlyq adamǵa senim uıalatatyn, bolashaqqa úmitpen qaraýǵa, pendege qajyr men qaırat beretin eń bir izgi qasıet bolǵandyqtan, ár kez basqa túsken qıynshylyqqa sabyrlyq tanytýǵa umtylaıyq. Bul qıynshylyqtarǵa da moıymaı, el basyna týǵan synaqty birge eńseretinimizge senemiz. Alla Taǵala qaýiptiń betin qaıtaryp, halqymyzǵa qalypty ómir násip etkeı», dedi bas múftı.
Aıta ketsek, osydan birer kún buryn «Zeket jáne qaıyrymdylyq» qory ókilderi sý tasqynynan zardap shekken Aqtóbe oblysyna barǵan bolatyn. Qor dırektory Maqsatbek Qaıyrǵalıev atalǵan óńirdegi jedel shtabtyń jumysymen tanysyp, aımaq turǵyndaryna 500 rezeńke etik, 2 500 qap, 2 000 jórgek, 2 000 kórpe-tósek, 2 qaıyq, qaıyqqa 3 qozǵaltqysh, jaryq qurylǵysyna 2 qozǵaltqysh, t.b. turmystyq zattardy jetkizdi. Sondaı-aq Aqtóbe qalasynda 1 000, Oıyl aýdanynda 300, Qobda aýdanynda 200 adamǵa ystyq tamaq berildi.
Aıryqsha atap óter jaıttyń biri – qordyń Aqtóbe oblysy ókildigi «El úlesi – páterge» jobasy boıynsha 746-baspananyń kiltin tasqynnan zardap shegip, úısiz qalǵan jalǵysbasty anaǵa tabystady. 2-toptaǵy múgedek balalardy asyrap otyrǵan Zına Joldalıqyzy qıyn sátte qolushyn sozǵan QMDB ókilderine alǵysyn jaýdyrdy. Aıta keteıik, bul – Ramazan aıyndaǵy «30 kúnde 30 baspana» aksııasy aıasynda berilip otyrǵan 26-baspana.
