Alaıda «kórshisiniń úıi órtengende bas úıitip alatyn» qaraqan basyn oılaǵan jandar da joq emes eken. Halyqqa barynsha qolushyn sozýdyń ornyna kóliktiń, azyq-túliktiń, qala berdi sýdy bógeıtin qum qapshyqtarynyń baǵasyn kóterip satý – adamshylyqqa jatpaıtyn áreket. Mundaıdan aýlaq bolsańyzdar eken! «Kemedeginiń jany bir» degen qazaq. Qysyltaıań ýaqytta qınap alǵan teńgeniń esh berekesi bolmaıdy.
Osy tusta el ishine jik salyp, jar astynan jaý shaqyratyn blogerler myńdaǵan oqyrmandarynyń aldyndaǵy jaýapkershiligin sezinýi kerek. Dúdámal habar taratyp, dúrbeleń salýǵa bolmaıdy. Osyndaı jekelegen jandardyń kesirinen, etigimen sý keship halyqqa kómek kórsetetin jankeshti azamattardyń eńbegi eleýsiz qalyp qoıady. Sondyqtan bárimiz eldiń birligin basty orynǵa qoıýymyz kerek. Eń bastysy – jan shyǵynyna jol bermeý.
«Alpys kún tasqan darııa alty kúnde qaıtady» deıdi dana halqymyz. Bul kún de óter. Atqarýshy organdardyń olqylyqtaryn túzep, apattyń qaıtadan qaıtalanbaýyna nazar salýymyz kerek. Al bógetterge bólingen qarajatty ornyna jumsamaǵan bılik ókilderi halyq aldynda jaýapqa tartylady degen oıdamyn.
О́zim jumys isteıtin teatr ujymy da únsiz qalmaıdy. Buǵan deıin de ujymymyz apatty óńirlerge qarjylaı kómek kórsetip otyrǵan. Qazirgi jaǵdaıda da teatr basshylyǵy kómek kórsetý men qoldaý bildirý jumystarynyń josparyn qyzý talqylap jatyr.
Tilektes MEIRAMOV,
Qazaqstannyń halyq ártisi, Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń akteri
