Memleket basshysy Q.K. Toqaev óziniń halyqqa arnaǵan úndeýinde tabıǵı apattan zardap shekkenderdiń barlyǵyna kómek kórsetiletindigin, mal-múlikteriniń ótemi bolatynyn, úıi ketkenderge úı salynyp beriletin aıtyp, memleketimizde múmkindiktiń bar ekendigin, barlyq kúshtiń jumyldyratyndyǵyn jetkizdi. Sabyrlyq tanytyp, yntymaq pen birlik kórsetip otyrǵan elge raqmet aıtty. Prezıdentimizdiń ózi de Batys Qazaqstan oblysyna baryp, turǵyndarmen kezdesip, jaǵdaıdy óz kózimen kórip qaıtty. Premer-Mınıstr men onyń orynbasarlary, jaýapty mınıstrlik basshylary túgel sý basqan aımaqtarda júr, jaǵdaıdy retteý úshin tıisti sharalar qabyldaýda. О́zderi saılanǵan óńirlerge baryp, eldiń eńsesin kóterip, qal-jaǵdaı surasyp, tıisti kómek kórsetýge atsalysqan QR Parlamenti Senatynyń depýtattary da kúndiz-túni bir tynbaı, tolarsaqtan sý keship jumys jasap júrgen ákimder men ákimdik qyzmetkerleriniń, erikti volonterlardyń, qoǵam belsendileriniń jankeshti áreketterin rızashylyqpen atap ótýde. Bir sózben aıtqanda bul tótenshe jaǵdaı bizdiń elimizdiń birligi men patrıotızminiń jarqyn kórinisi boldy dep aıtýǵa bolady.
«Malym janymnyń sadaqasy, janym arymnyń sadaqasy» – dep ótken babalardyń urpaǵy malyn da, janyn da aıamaı osy tótenshe jaǵdaımen kúresip, zardap shekkenderge kómek kórsetip jatqan jomart jandarǵa alǵystan basqa aıtar sóz joq. «Jaqsylyq aıtyp jasalynbaıdy» – demekshi, úles qosyp jatqan azamattardyń kópshiliginiń aty belgisiz, artylyp, jóneltilip jatqan zattar men múlikterdiń, azyq-túlikterdiń ıeleri de beımálim. Biraq osy qıyndyqta úles qosyp, qınalǵan adamǵa arasha túsip jatqan jany-jomart jandarǵa Alla razy bolsyn degimiz keledi.
Eń úlken rızashylyqty biz sý basyp, úısiz, jaısyz qalsa da, mal-múlkinen aıyrylyp otyrsa da úlken sabyrlyq tanytyp, kóppen kórgen qıyndyqtarǵa moıymaı táýbe etip, bardy qanaǵat tutyp, joqqa renish bildirmeı, memleketke, memlekettik organdarǵa senim artyp, aradaǵy ashýǵa berilgenderge basý aıtyp, erteńge úmit artyp, eldik qasıet tanytyp otyrǵan myńdaǵan turǵyndarǵa aıtqymyz keledi. Shynynda da bul jaǵdaı halyqqa da, memleketke de aýyr salmaq túsirip otyr. Zardap shyǵynyn óteýdiń ózi memleket qazynasy úshin úlken kúsh. Biraq bizdiń memleketimizdiń múmkindigi zor, halqymyzdyń jigeri jeterlik. Bul qıyndyqtan da shynyǵyp shyǵatynyna kámil senemiz. Eń negizgisi adamdarymyz aman, denderi saý bolsyn. Osyndaıda birlik pen sabyrdy tý etken el ǵana barlyq qıyndyqty eńseredi. Erteń budan da jaqsy kúnder kelip, turmys túzeledi. «Bir joqshylyqtyń, bir toqshylyǵy bolady», – degen kóregen babalarymyzdyń asyl qasıetteri damyǵan halqymyz aman, jurtymyz tynysh bolǵaı. Jarqyn kúnderimiz jaqyndap, qýanyshtarymyz arta tússin.
Barsha Qazaqstandyqtardy Oraza aıtymen quttyqtaımyn. Otyz kún orazadaǵy tilegen tilekter men nıetter qabyl bolsyn. Ramazannan-ramazanǵa, aıttan-aıtqa aman esen jete bereıik. Qıyndyqtardy erterek eńserip, jaqsy kúnderimiz kóp bolsyn.
Álı Bektaev
QR Parlamenti Senatynyń depýtaty,
Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy
