Tasqyn sý 5 sáýirde aýdan ortalyǵy Qulsary qalasyna kire bastady. Sodan beri qalada tasqyn sý áli tur. Tasqyn sý qaýpinen 10 sáýirge deıin 36 003 adam evakýasııalandy. Onyń ishinde 8 331 bala bar. Eldi mekender turǵyndarynyń ıeligindegi 19 939 bas mal qaýipsiz jerge aıdaldy.
Jylyoı aýdany ákimdiginiń aqparatyna súıensek, Qulsary qalasyndaǵy «Atyraý», «Avtojolshylar», «Dostyq» shaǵyn aýdandary men 2-aýyl, mýzeı mańyndaǵy 3 qabatty 5 úı gazdan ajyratyldy. Jer astyndaǵy gaz qubyry zaqymdalyp, sý kirgendikten 4-shi jáne 6-aýyldaǵy turǵyn úılerdiń jartysyna gaz qosý múmkin bolmaı tur.
Munda 2 800 turǵyn úı men ákimshilik nysandy sý basty. Qazir qaraýsyz qalǵan úılerdi 110 polıseı men 60 sarbaz qadaǵalap júr. Tártip saqshylary qalany kúndiz de, túnde de patrýldeıdi. Jylyoı aýdandyq polısııa bóliminiń jedel basqarý ortalyǵyndaǵy beınekameralar arqyly tasqyn sý basqan kóshelerge baǵyt alǵan kólikter men turǵyndar tekseriledi. Turǵyndarǵa túsindirý jumystary júrgizilip jatyr.
Qulsaryda 6 sáýirde ákesi men balasy joǵalyp ketti. Olar Qulsary qalasyndaǵy 4-shaǵyn aýdandaǵy «Grand Hall» meıramhanasynyń qasynda ornalasqan tasqyn sý basqan úıin qaraýǵa barǵan. Ákesiniń jasy – 48-de, al balasy 24 jasta eken. О́kinishke qaraı, ekeýi de áli kúnge tabylǵan joq.
Al 9 sáýirde tótenshe jaǵdaılar departamentiniń qutqarýshylary sý betine qalqyp shyqqan múrde taýyp aldy. Bul jóninde polısııa qyzmetkerlerine habarlap, múrdeni tapsyrǵan eken. Polısııa qyzmetkerleriniń aıtýynsha, múrde tasqyn sý astynda qalǵan zırattan shyǵýy múmkin. Tártip saqshylary osyndaı tujyrym jasap otyr.
Oblystyq bilim basqarmasy basshysynyń mindetin atqarýshy Sveta Amanshıeva deregine qaraǵanda, 7 sáýirden Jylyoı aýdanynan evakýasııalanǵan otbasylardyń mektep jasyndaǵy balalaryn qashyqtan oqytýǵa sheshim qabyldandy. Biraq áli kúnge bul aýdannan qansha oqýshy onlaın oqıtyny belgisiz bolyp otyr.
Jaıyq ózeninen sý tasqynynyń qaýpi tónedi degen boljam aıtylyp otyr. Bul el turǵyndaryn beıjaı qaldyrmady. Oblys ákimi Serik Shápkenovtiń aıtýynsha, tasqyn sýdyń qaýpi tónetin Inder men Mahambet aýdandary men Atyraý qalasyn qorǵaýǵa basa nazar aýdarylyp otyr. Qazir barlyq kúsh Jaıyq ózeniniń jaǵalaýyn bekitýge jumyldyryldy. О́ıtkeni Jaıyq ózeniniń jaǵalaýynda 26 eldi meken bar. Onyń jeteýi – Inder, 18 aýyl Mahambet aýylynda ornalasqan. Atyraý qalasynyń ákimshilik bólinisine qaraıtyn birneshe eldi meken Jaıyq ózenine tıip tur.
«Qazgıdromet» RMK Atyraý oblystyq fılıalynyń málimetinshe, Jaıyq ózeninde sý deńgeıi kún saıyn kóterilip keledi. Máselen,10 sáýirde tańǵy saǵat 08.00-de Inderbor kentindegi gıdrobekette sý deńgeıiniń kóterilýi 27 sm-di quraǵan. Sý tasqyny bastalǵannan beri jalpy sý deńgeıiniń kóterilýi 2 metr 43 sm-ge jetip otyr. Al Mahambet kentinde sý deńgeıi 45 sm-ge kóterilgen. Qazirgi deńgeıi – 2 metr 23 sm. Atyraý qalasynda ózen sýy 36 sm-ge ulǵaıyp, 2 metr 85 sm-di qurady.
«Jaıyq jaǵalaýynda qorǵanys bógetin nyǵaıtý jumysy kúsheıtildi. Osy maqsatta barlyq jol-qurylys jumysy toqtatyldy. Iri munaı kompanııalarymen kelissózder júrgizildi. Ásirese Jaıyq ózeniniń Atyraý qalasy aýmaǵyndaǵy jaǵalaýy 107 ýchaskege bólindi. Qazir Atyraý qalasyndaǵy jaǵalaýda 673 arnaıy tehnıka men 7 myńǵa jýyq erikti jumys istep júr. Keıingi úsh kúnde 42 shaqyrym jaǵalaýdy qorǵaý bógeti men 350 myńnan asa qap tóseldi», dep habarlady oblys ákiminiń baspasóz hatshysy Rýslan Jumaǵazıev.
«QazSýShar» RMK-niń málimetine súıensek, Atyraý oblysynyń aýmaǵynda bastaýyn Jaıyq ózeninen alatyn 15 magıstraldy sý arnasy bar. Tasqyn sýdy 24 shaqyrymǵa sozylatyn Sokolok kanaly arqyly Kaspıı teńizine burý úshin bóget bıiktetilip jatyr. Bul kanaldyń boıyndaǵy jumysqa NCOC kompanııasynyń 30-ǵa jýyq tehnıkasy tartylǵan. Qazir bógettiń 2 shaqyrymdyq bóliginde jumys aıaqtaldy. Úılestirýshi Oljas Sultanovtyń aıtýynsha, osy aptada jumys aıaqtalýǵa tıis. Osy maqsatta qosymsha adam kúshi men tehnıkalar tartý kózdelipti.
Jaıyq ózeniniń jaǵalaýyndaǵy osal tustardy bekitýge kásiporyndar men mekemeler bekitilgen. Máselen, H.Dosmuhamedov atyndaǵy Atyraý ýnıversıtetiniń ustazdary men stýdentteri Almaly aýlynda bóget salýǵa kiristi. Bul aýylda ýnıversıtettiń oqytýshy-professorlar quramy men stýdentteri úsh aýysymmen jumys isteıdi. Olar úsh kúnde 20 myńnan asa qapqa topyraq toltyrǵan. Almaly aýlyna belgili kompozıtor, Qazaqstannyń Eńbek eri Ilııa Jaqanov Almaly aýlyna arnaıy kelip, ýnıversıtet oqytýshylarymen, stýdentterimen birge qapshyqqa topyraq toltyryp, bóget salý jumysyna úlesin qosty.
«Tirshilik nári Jaıyǵymyz arnasynan aspasa eken, el qıyndyqqa kezikpese deımin. Qazir sý tasqyny Atyraý oblysyna ǵana emes, birneshe óńirge qaýip tóndirdi. Sol sebepten bóget salyp jatqan jastardy qoldaýǵa keldim. Elimizdi qıyndyqtan birligimizben ǵana qorǵaı alamyz», deıdi I.Jaqanov.
Bóget salyp júrgen eriktiler qataryna «Atyraý barystary» oınaıtyn Kanadanyń azamaty Maıkl Okafor qosyldy. Ol muny – azamattyq paryzy sanaıdy.
«Qazir ózim turatyn Atyraý qalasyna tasqyn sýdyń qaýpi tóndi. Sheteldik bolsam da osy eldiń tynyshtyǵyn, ár qazaqstandyq pen qonaqtardyń kóńili kóterińki júrgenin qalaımyn. Sol sebepten Jaıyq ózeniniń jaǵalaýyndaǵy bógetti bıiktetip jatqan volonterlerge kómektesýdi uıǵardym. Biz Atyraý qalasyn tasqyn sýdan birliktiń nátıjesinde qorǵap qalamyz», deıdi M.Okafor.
Al Mahambet aýdanynda Jaıyq ózeniniń jaǵasyna bóget turǵyzyp júrgen eriktiler tosyn jaıtqa kezikti. Bógetke qajet topyraq alý kezinde adamnyń 12 bas jáne 26 ózge súıegi tabyldy. «Saraıshyq» mýzeı-qoryǵynyń dırektory Muhtar Ábilseıittiń aıtýynsha, quzyrly organdardyń mamandary tergeý aldy tekserý jumystaryn bastaǵan.
Atyraý oblysy
