Shonjy aýylyndaǵy birinshilikte kókpardan eresekter synǵa tússe, aýdaryspaq, teńge ilý, jamby atýdan 2004-2006 jylǵy taqymy myqty jastar jarysty.
At jalyndaǵy básekeli jarys qorytyndysy boıynsha jamby atýda túrik stıli boıynsha Jarylqasyn Bekarys, koreı stılinde Sharynbaı Madııar, qazaq stılinde Qazbek Asylbek jeńimpaz atandy.
Jamby atýdan jalpy komandalyq esepte Qarasaı aýdanynyń sportshylary 1-oryndy ıemdense, 2-oryn Qonaev qalasynyń, al júldeli 3-oryn Eńbekshiqazaq aýdanynyń enshisine tıdi.
Aýdaryspaqta da 55 pen 95 kg arasyndaǵy ártúrli salmaq dárejeleri boıynsha kil myqtylar anyqtaldy.
«Qos qulash», «Bes beles» jáne «Jeti qut» stıli boıynsha teńge ilýden synǵa túsken sportshylardyń jarysy chempıonattyń kórigin qyzdyryp, kórermenniń qoshemetine bólendi.
Kókserkeni taqymdap, qara jerdiń shańyn shyǵarǵan kókpar jarysynda Jambyl aýdanynyń sportshylary aldyna qara salmaı, jeńimpaz atansa, 2 jáne 3-oryndardy Kegen men Raıymbek aýdanynyń komandalary ózara bólisti.
Jekelegen atalymdar boıynsha Raıymbek aýdanynan kelgen kókparshy Abaı Maǵjan – «Eń úzdik salymshy», Jambyl aýdanynyń sportshysy Noǵaıbek Dýlat – «Eń úzdik qorǵaýshy», al kegendik Serikjan Baqdáýlet «Eń úzdik oıynshy» atalymyn enshiledi.
Ultymyzdyń rýhyn asqaqtatqan at sporty jarysynda taýly óńirdiń túlekteri teńdessiz oıyn órnegin kórsete bildi. Jalpy komandalyq esep boıynsha Raıymbek aýdany 1-oryn alsa, 2-orynǵa Kegen aýdanynyń sportshylary taban tiredi. Al 3-oryndy Qonaev qalasynyń komandasy ıelendi. Jarys jeńimpazdary men júldegerlerge arnaıy medaldar men gramotalar, aqshalaı sertıfıkattar tabys etildi.
Almaty oblysy
