Is-sharanyń maqsaty – elimizdiń ósip-órkendeýine úles qosqan ardager analarymyzdyń qoǵamdaǵy bedelin kóterý, olarǵa qoldaý kórsetý. Sharaǵa Qarasaı aýdanynan – 3, Jambyl aýdanynan – 1, Almaty qalasynan 1 ájeler ansambli qatysyp, baq synady. Ár aýyldyń namysyn arqalap kelgen ájeler tamyljyta án shyrqap, kópshilikti tamsandyrdy. Aýdandyq ájeler ansambliniń baıqaýy «Almaty oblysy mýzeıler birlestiginiń» basshysy Erjan Toqtarulynyń quttyqtaýymen ashyldy.
– Iá, ana bir qolymen besik terbetse, bir qolymen álemdi terbetedi. Al ulttyń altyn qory – ana men bala. Sondyqtan bul baıqaýdy kópke úlgi dep bilemin. О́ıtkeni ájeler salǵan dana jolda urpaqtar ósedi, jaqsy tálim-tárbıe alady, – dedi birlestik basshysy.
Baıqaý erejesi úsh kezeńnen turdy. «О́nerli netken ájeler» atty alǵashqy kezeńde qatysýshylar óz ónerlerin kórsetse, «Besik jyry – basty jyr» dep atalatyn ekinshi kezeńde zamanaýı nemese ózderi shyǵarǵan besik jyryn áýelete shyrqady. Al «Umyt bolǵan ulttyq salt-dástúrler» kezeńinde umytyla bastaǵan salt-joralǵylarymyz boıynsha kórinis kórsetildi. Sonymen qatar ánder túrli mýzykalyq aspaptardyń súıemeldeýimen jandy daýysta oryndaldy. Án búkil sana-sezimińdi baýrap alyp jetkize alatyn qudiretti qasıetke ıe. Al ájelerdiń salǵan ánderiniń maqamy da, mazmuny da múldem bólek boldy. Bulbuldaı saırap, gúldeı qulpyrǵan aq jaýlyqtylar sahnanyń sánin keltirdi. Ansambldiń quramy 10-12 adamnan kem bolmady. Qatysýshy ájelerdiń jas ereksheligi 65 jastan joǵary bolǵany eskerildi. Ájeler baıqaýynyń ótkizilýine bastamashy bolǵan, basty uıymdastyrýshysy – «Anaǵa qurmet» mýzeıiniń meńgerýshisi Gúlnar Baqytqalıqyzy.
Baıqaýǵa «Anaǵa qurmet» mýzeıiniń uıymdastyrýshysy, professor, ardaqty ustaz Baqyt Shpekpaeva, ardager jýrnalıst, kıeli kımeshekti nasıhattaýshy Arshagúl Toıbaeva, ustaz Záýre Nakıpova, «Almaty oblysy mýzeıler birlestiginiń» basshysy Erjan Toqtaruly tórelik etip, ájelerge ystyq yqylasyn bildirdi.
Baıqaýdyń nátıjesinde bas júldeni Raıymbek aýyldyq okrýginiń «Darıǵa dáýren» ájeler ansambli alsa, 1-oryndy Úmbetáli aýylynyń «Bópejan» ájeler ansambli ıelendi. 2-orynǵa Shamalǵan aýyldyq okrýginiń «Aq ájeler» ansambli laıyq dep tanylsa, úzdik úshtikten Eltaı aýyldyq okrýginiń «Asyl ájeler» ansambli kórindi. Kúlıman ana atyndaǵy arnaıy júlde «Almaty qalasynyń belsendi ómir súrý ortalyǵynyń» ájelerine buıyrdy. Osylaısha, baıqaýda ájeler áýendi ánderdi naqyshyna keltire oryndap, saz óneriniń ıirimin ushtastyrdy. Bolashaqqa ulttyq qundylyqtarymyzdy syryn buzbaı jetkizý dál osyndaı sharalardan bastaý alady.
Aqerke AMANTAI,
«Anaǵa qurmet» mýzeıiniń ǵylymı qyzmetkeri
