Sýretti túsirgen – Rahym QOILYBAEV
Balyq sharýashylyǵy komıteti tóraǵasynyń orynbasary Aıan Bahııanovtyń aıtýynsha, naýryzda Aýyl sharýashylyǵy jáne Ishki ister mınıstrleri men Ulttyq qaýipsizdik komıteti tóraǵasynyń birlesken buıryǵy shyǵarylǵan. Soǵan sáıkes úılestirý shtabynyń quramy men Jaıyq-Kaspıı sý basseıninde keń aýqymdy balyq qorǵaý aksııasyn ótkizý jónindegi birlesken is-qımyl jospary bekitildi.
«Mundaı birlesken jumys bekire jáne basqa balyq túrlerin saqtaýda oń nátıje beredi. Is-sharany júzege asyrý azyq-túlik qaýipsizdiginiń mańyzdy faktory retinde balyq sharýashylyǵyn odan ári damytýǵa, tabys kózi retinde áleýmettik máselelerdi sheshýge, jergilikti turǵyndardy jumyspen qamtýdy qamtamasyz etýge múmkindik beredi. Aksııaǵa batystaǵy úsh oblystan 1 177 qyzmetker jumyldyrylyp otyr. Máselen, 374 qyzmetker Atyraýda, 254 qyzmetker Batys Qazaqstan óńirinde, al 549 maman men áskerı qyzmetshi Mańǵystaý oblysynyń aýmaǵynda aksııanyń sátti ótýine atsalysady», dedi A.Bahııanov.
Onyń aıtýyna qaraǵanda, aksııa aıasynda brakonerlik faktiler jıi baıqalýy yqtımal aýmaqtarda jyljymaly beketter men mobıldi reıdtik toptar uıymdastyrylady. Osyǵan baılanysty negizgi kúshter men quraldar Kaspıı teńiziniń jaǵalaýy men akvatorııasynda, Jaıyq pen Qıǵash ózenderiniń saǵalyq keńistiginde shoǵyrlanady.
«О́tken jyly úsh óńirdegi «Bekire-2023» balyq qorǵaý aksııasy kezinde 972 quqyq buzýshylyq anyqtaldy. Quqyq buzǵan 669 adam ákimshilik jaýapkershilikke tartylyp, olarǵa 15,7 mln teńge aıyppul salyndy. Zańsyz aınalymnan 68,3 tonna balyq alyndy. Onyń ishinde 1 tonna bekire tuqymdas balyq túrleri, 29,5 kg bekire tuqymdas balyqtardyń ýyldyryǵy bar. Tabıǵat qorǵaý zańdylyǵyn buzǵandardan 1038 túrli balyq aýlaý, 89 júzý jáne kólik quraly tárkilendi», dep málim etti A.Bahııanov.
Atyraý oblysynyń polıseıleri «Bekire-2024» balyq qorǵaý aksııasyna belsene kiristi. Tártip saqshylary Atyraýdan Batys Qazaqstan, Aqtóbe, Mańǵystaý jáne Reseıdiń Astrahan oblysyna qatynaıtyn jolmen júretin kólikterge baqylaý júrgizedi. Mundaı baqylaýdan Inder aýdanyna, Isataı aýdanyndaǵy Janbaı, Atyraý qalasynyń mańyndaǵy Damby aýylyna qatynaıtyn jol da tys qalmaıdy.
«Balyq qorǵaý is-sharasy kezinde shekara mańyndaǵy memleketterdiń tıisti organdarymen yntymaqtastyq aıasynda uıymdasqan qylmystyq toptar áreketiniń jolyn kesýge, zańsyz aýlanǵan balyq ónimderin satyp alý jáne satý naryǵyn joıýǵa basa mán beriledi. Brakonerlerge «qamqorshylyq» tanytatyn laýazymdy tulǵalardy anyqtaýǵa baǵyttalǵan arnaıy jedel-izdestirý is-sharasy ótkiziledi», dep habarlady departamenttiń baspasóz qyzmeti.
Al balyq sharýashylyǵy komıteti 2 sáýirde Atyraýda birlesken reıd ótkizdi. Oǵan oblystyq polısııa departamenti men mamandandyrylǵan prokýratýranyń qyzmetkerleri qatysty. Reıd kezinde munaıly shaharǵa taıaý ornalasqan Damby aýyly mańyndaǵy eki ózektiń boıy tekserildi.
«Túngi saǵat 00.50-de Jaıyq ózeniniń taraıtyn ózektiń jaǵasynan 313 kılogramnan astam bekire tabyldy. Brakonerler 14 qapqa salynǵan baǵaly balyqty qamys arasyna jasyryp ketipti. Al saǵat 06.00-de bekire tabylǵan tustan shamamen 400 metr qashyqta ózen jaǵasyna bekitilgen aspaly motory bar 8 júzý quraly tabyldy. Onyń ishinde úsh «Iаmaha-200», bir «Iаmaha-225» jáne tórt «Baıda» qaıyǵy bar. Iesiz júzý quraldary tárkilendi», degen aqparat taratty komıtettiń baspasóz qyzmeti.
Zańsyz aýlanǵan bekirege baılanysty derek Qylmystyq kodektiń 339-babynyń 1-bóligimen sotqa deıingi tergep-tekserýdiń biryńǵaı tizimine tirkelip otyr. Baǵaly balyq qoryna keltirilgen zalal shamamen – 173 505 540 teńge.
Atyraý oblysy
