Resmı málimet boıynsha, 10 sáýirde UQK Jambyl oblysy boıynsha departamenti polısııa departamentiniń ishki qaýipsizdik basqarmasymen birlesip, Taraz qalalyq IIB kóshi-qon qyzmetiniń eki qyzmetkerin ustady.
- Olar zańsyz júrgen shetel azamattaryna qamqorlyq jasaǵany úshin 500 myń teńge kóleminde para aldy degen kúdikke ilindi. Ustalǵandar ýaqytsha ustaý ızolıatoryna qamaldy. Qylmystyq kodekstiń “Para alý” baby boıynsha sotqa deıingi tergeý amaldary júrgizilýde, – delingen habarlamada.
Ulttyq qaýipsizdik komıteti Qylmystyq-prosestik kodekstiń 201-babynyń 1-bóligine sáıkes ózge de málimetter jarııa etýge jatpaıtynyn atap ótti.
Eske salsaq, osyǵan deıin Jambyl oblysynda eki birdeı polısııa podpolkovnıgi para alý kezinde qamaýǵa alynǵan.
