Qoǵam, jańa zaman kadrlardy, onyń ishinde ǵylymı mamandardy daıarlaýdyń jańa tásilderin, jańasha kózqarastardy, baǵyttardy talap etip otyr. Z urpaǵy – ǵylymnyń bolashaǵy. Bilim berýde jańa tásilder jasap, tym eski, qazirde ózektiligin joıǵan tásilderden alystaý qajet. Álbette, usynystar bergen oryndy, degenmen ár adam ózgeristi syrttan kútpeı, «Men ne isteı alamyn?» degen suraqtan, ıaǵnı ózinen bastaǵany durys-aq.
«Stýdent – toltyrýdy qajet etetin ydys emes, janýy kerek alaý. Al alaýdy ózin-ózi órtegen adam ǵana jaǵa alady» dep Plýtarh aıtqandaı, qazirgi ýaqytta Z urpaǵy arasynda ǵylymdy nasıhattaýǵa barlyq múmkindik bar. Mysaly, jas ǵalym jáne pedagog retinde men podkasttar men suhbattar serııasyn, «Taǵam qaýipsizdigi» ǵylymı úıirmesin jáne https://t.me/Dr_Laura_bot telegram botyn iske qostym. Podkast ǵylym men óndiriste taǵam qaýipsizdigin nasıhattaýdy kózdeıdi. Bizdiń qonaqtar ǵylymdaǵy, bıznestegi jetistikterin baıandaıdy. Al «Food safety» ǵylymı úıirmesine ýnıversıtetimizdegi «Veterınarııa jáne mal sharýashylyǵy tehnologııasy» fakýltetiniń stýdentteri qatysady. Biz «Astana qalasynyń tanymal kofehanalarynda kofeniń aflatoksınnen lastanýy» sekildi ártúrli ózekti taqyryp tóńireginde ǵylymı zertteýler júrgizemiz. Osyndaı kishkentaı qadamdar ǵylymdy jastardyń tilinde, zamanaýı ádistermen, tehnologııalarymen, tásildermen túsindirýge, jas býyndy ǵylymǵa tartýǵa múmkindik beredi.
Laýra AÝTELEEVA,
S.Seıfýllın atyndaǵy Qazaq ulttyq agrotehnıkalyq zertteý ýnıversıtetiniń qaýymdastyrylǵan professory, PhD
