Vıse-premer, Shtab jetekshisiniń orynbasary Qanat Bozymbaev Reseı Federasııasynan Jaıyq ózeni arqyly kólemdi sýdyń kútilip otyrǵany týraly baıandady.
Onyń aıtýynsha, Batys Qazaqstan oblysynda jańbyr jaýady. Saqmar ózeniniń deńgeıi kóterile bastady. Boljam boıynsha, Jaıyq jáne Saqmar ózenderiniń joǵarǵy jaǵynan sáýir aıynyń ekinshi onkúndiginde Batys Qazaqstan oblysynyń aýmaǵyna sý keledi. Qazirgi ýaqytta Oral qalasyndaǵy Jaıyq ózenindegi sý deńgeıi – 728 sm, ol 850 sm qaýipti mejege jaqyndaıdy dep boljanyp otyr.
Batys Qazaqstan oblysynan sýdyń kelýine baılanysty Atyraý oblysynda ótken táýlikte Jaıyq ózenindegi gıdrobeketterde de sý deńgeıiniń shamaly kóterilýi baıqalady. Sáýirdiń úshinshi onkúndiginde úlken sýdyń kelýi kútiledi.
Úkimet basshysy Oljas Bektenovtiń tapsyrmasymen onyń Batys Qazaqstan jáne Atyraý oblystaryna jumys saparlarynyń qorytyndysyna sáıkes ákimdikterdiń, TJM, IIM jáne Ulttyq ulannyń, Qorǵanys mınıstrliginiń kúshteri men quraldary jumyldyryldy.
Batys Qazaqstan oblysynda avarııalyq-qutqarý jumystaryn júrgizý úshin kúshtik qurylymdar 6 myń adamǵa, Atyraý oblysynda 4 myń adamǵa deıin jetkiziledi. Elimizdiń ár óńirinen 4 myńǵa jýyq tehnıka jiberildi.
Premer-mınıstr Qorǵanys jáne Ishki ister mınıstrlerine qajet bolǵan jaǵdaıda qosymsha jeke quram men tehnıka jiberýdi tapsyrdy.
«Oral men Atyraý boıynsha kúshter men quraldardy barynsha jumyldyrý qajet. Qazir úlken sýdy eldi mekenderge jetkizbeı, buryp áketý mańyzdy. Búgin qosymsha áskerı qyzmetshiler men tehnıka jiberile bastady. Sý aǵysynyń qarqynyn eskere otyryp, birinshi kezekte Oralda, odan ári Atyraýda aldyn alý jumystaryn kúsheıtemiz», dedi Oljas Bektenov.
Úkimet basshysy eki oblys ákimdikterine kelgen áskerı qyzmetshilerdi barlyq qajetti zattarmen qamtamasyz etý, sondaı-aq tehnıkaǵa janarmaı quıý máselesin sheshý jóninde tapsyrma berdi.
Búginde segiz oblysta jergilikti aýqymdaǵy tótenshe jaǵdaı rejimi saqtalǵan. Sý basqan aımaqtardan barlyǵy 97 myń turǵyn evakýasııalandy. 11 sáýirdegi jaǵdaı boıynsha Pavlodar jáne Abaı oblystarynda sý tasqyny jaǵdaıynyń turaqtanýyna baılanysty TJ rejimderi alynyp tastaldy.
