Foto: shutterstock.com
Mektep oqýlyqtaryn sıfrlyq formatqa kóshirý 100 paıyzdy qurap otyr, dep habarlaıdy mınıstrliktiń baspasóz qyzmeti. Olar memlekettik saraptamadan ótip, oqý-ádistemelik keshenderdiń tizimine engizilgen. Sıfrlyq oqýlyqtar elimizdegi 13 baspanyń 11 platformasynda ázirlengen.
Bilim sapasyn qamtamasyz etý komıteti tóraǵasynyń orynbasary Maıra Meldebekovanyń aıtýynsha, muǵalimderge jańa oqytý formatyn qoldaný boıynsha arnaıy ádistemelik nusqaýlar ázirlengen.
«Muǵalimder zamanaýı sıfrlyq tehnologııalardy, onlaın kommýnıkasııalardy, saralaý men daralaýdy paıdalana otyryp sabaq júrgizedi, sonymen qatar onlaın resýrstardy paıdalaný boıynsha bilimderin jetildiredi», dedi Meldebekova.
Sonymen qatar, qazaq mektepterinde robototehnıka, STEM, hımııa, fızıka, bıologııa pánderi boıynsha 1345 zamanaýı kabınet ashý josparlanýda. Jyl sońyna deıin 20 oblystaǵy 1072 mektep zamanaýı úlgidegi kabınettermen jabdyqtalady dep ýáde etilgen.
Eske salaıyq, ótken jyly 1-11-synyptar aralyǵyndaǵy barlyq oqý pánderiniń 80 paıyzy elektrondy oqýlyqtarmen qamtylǵany habarlanǵan bolatyn. Ázirlengen jáne tizimge engizilgen oqýlyqtardyń jalpy sany 436 ataýdy qurady. Taǵy 255 elektrondy oqýlyq ekspertızadan ótti.
Qyrmyzy JUMAǴALIQYZY,
EUÝ stýdenti
