Foto: jambylinfo.kz
Elimizdiń jeti óńirindegi qarǵyn sýdan zardap shekken aǵaıynǵa qoldaý bildirý maqsatynda Jambyl oblysynan gýmanıtarlyq júk artqan 17 júk kóligi jolǵa shyqty. Derekke júginsek, ár kólik 20 tonnadan júk artqan eken. Júk kólikterine kıim-keshek, azyq-túlikten bastap, ózge de eń qajetti zattar tıelgen. Bul – óńir turǵyndarynyń kómegi.
«Qarǵyn sýdan zardap shekken óńirlerge jambyldyqtar tarapynan kórsetiletin gýmanıtarlyq kómekti jiberýdi jalǵastyryp jatyrmyz. Mundaı qıyn-qystaý kezeńde bir jeńnen qol, bir jaǵadan bas shyǵarýdyń mańyzdy ekeni túsinikti. Eldik máseleni óńir basshysy Erbol Qarashókeev tikeleı óz baqylaýyna alyp otyr. Gýmanıtarlyq kómek sanatyna azyq-túlik taýarlary, kıim-keshek jáne ózge asa qajetti zattar engen. Shalǵaıdaǵy aǵaıynǵa qıyn kúnderde qoldaý kórsetýge nıet bildirip otyrǵan árbir azamatqa alǵystan basqa aıtarymyz joq. Bul – sý tasqynynan zardap shekken óńirlerdegi turǵyndarǵa joldaǵan Jambyl oblysy halqynyń gýmanıtarlyq kómegi. Oblys ákimdigi júk kólikteriniń shyǵynyn moınyna alyp, uıymdastyrý jumystaryna ǵana atsalysyp otyrǵanyn aıta ketken jón», deıdi óńir basshysynyń orynbasary Ábilhaıyr Tamabek.
Á.Tamabektiń aıtýynsha, gýmanıtarlyq kómek mejelengen ýaqytta Aqmola, Soltústik Qazaqstan, Qostanaı, Aqtóbe, Batys Qazaqstan, Qaraǵandy oblystaryna jetkizilmek.
«Júk kólikteriniń qaýipsizdigin memlekettik avtoınspektorlar qadaǵalaıdy. Gýmanıtarlyq kómekti birinshi kezekte óńir halqynyń syn saǵattaǵy qoldaýy men janashyrlyǵy dep túsingen lázim», deıdi Á.Tamabek.
О́ńir turǵyndary sý tasqynynan zardap shekken óńirlerge qoldaý kórsetý maqsatynda áli de bolsa judyryqtaı jumylyp, biraz isti tyndyratyn sekildi. О́ıtkeni bul jumysqa eriktiler de kirisip ketkenin kórip otyrmyz. Buǵan deıin áýlıeatalyq volonterlerden quralǵan top gýmanıtarlyq kómekti Aqtóbe qalasyna jetkizip bergen edi.
Jambyl oblysy
