Hrızantemanyń keıingi kezde jastar arasynda keńinen suranysqa ıe bola bastaǵany baıqalady. Soǵan qarap mahabbattyń nyshanyn bildiretin raýshan gúlin almastyrýǵa laıyq ekenin joqqa shyǵarýǵa bolmaıdy. Eltaı aýyldyq okrýginde ornalasqan bul jylyjaıda ótken jyldyń qazan aıynan bastap osy sortty jersindiripti. Balasha baptap, erekshe kútim jasaýdyń nátıjesinde bıylǵy kóktem merekesinde 500 myń danaǵa jýyǵy satylymǵa shyqqan.
«Bul – elimizdegi alǵashqy joba. Jańa sorttyń aýmaǵy 3,5 gektar jerdi alyp jatyr. Saýda sóresine jol tartqan alǵashqy ótimi óte jaqsy boldy. Daıyndyqty ótken jyldyń jeltoqsan aıynan bastaǵanbyz, nátıje jaman bolmady», degen jylyjaıdyń bas agronomy Móldir Myrzahmetova gúldiń ósý úderisin baıandap berdi.
Mamannyń aıtýynsha, gúl kósheti otyrǵyzylǵannan keıin 45 kún degende qaýashaǵyn jaryp, ónim bere bastaıdy eken. Jyl on eki aı boıy bir tamyrdan ósip shyqqan sabaqty bes jyl boıy paıdaǵa jaratýdyń sharýashylyq úshin tıimdiligi orasan zor.
Otandyq óndiriste oıyp oryn alatyn «Eco Sultura» jylyjaı kesheniniń sol qanatta ornalasqan 3,5 gektar gúlstany 10 jyldan beri jumys istep keledi. Munda gúl ataýlynyń 23 sorty ósiriledi. Soǵan saı jumysy da jyl boıy saıabyrsyǵan emes. Aıyna orta eseppen 800 myń dana gúl satylymǵa shyqsa, kórsetkish 8 naýryz merekesi kezinde mıllıon danaǵa jýyqtapty. Joǵary sapaǵa ıe ónimniń jartysynan astamy Reseı naryǵyna jóneltiledi.
Qys boıy ishki temperatýrasy 20 men 25 gradýs jylylyqty saqtaıtyn alyp keshende 200-ge jýyq aýyl turǵyny turaqty jumys istep, óz nápaqasyn taýyp júrgenin aıryqsha ataý lázim.
«Men 6 jyldan beri osy jylyjaıda jumys istep kelemin. Mundaǵy jumysymyz – gúlderdi sorttaý. Kúnine 32 myń danadaı gúl sorttalady. Jumysym ózime unaıdy. Eńbekaqymyzdy da ýaqytynda alamyz», deıdi gúl sorttaýdyń sheberi Janııa Qurbanova.
Jyldyń qaı mezgilinde de jaqynyna gúl syılap, kóńil aýlap, qýanta biletin talǵamy bıik tutynýshylar barda jaıqalǵan jylyjaı óniminiń sany artpasa kemimesi anyq.
Almaty oblysy
