Foto: kk.wikipedia.org
Pavlodar oblysy jer qoınaýyn paıdalaný, qorshaǵan orta jáne sý resýrstary basqarmasynyń basshysy Áıgerim Qabyltaeva bıyl Shyǵys Qazaqstandaǵy Buqtyrma men Shúlbi sý qoımalarynan jalpy kólemi 6,2 tekshe kılometr sý jiberiletinin habarlady. Bul – ótken jylmen salystyrǵanda 1,5 esege kóp. Mundaı kólemdegi mol sý sońǵy 11 jylda birinshi ret jiberilip jatyr.
«10 sáýirden Shyǵystaǵy sý qoımalary óz shlıýzderin ashyp, alǵashqy sý jiberý sharalaryn bastap ketti. Sý jiberý sharalary negizgi úsh kezeńnen turady – daıyndyq, negizgi ıadro jáne aıaqtalý kezeńi. Alǵashqy eki kúnde sekýndyna shamamen 2 myń tekshe metr sý jiberiledi. Odan soń 18 kún boıy sekýndyna 3 500 tekshe metr sý Ertiske quıyla bastaıdy. Ertis jaıylmalarynyń sýǵa qanyǵýy úshin dál osy 18 kúni mańyzdy. Osy ýaqytta ózen betinde búıirlik aǵyndardyń esebinen úlken tolqyndar paıda bolyp, zor ekpinmen kelgen sý jaıylmalarǵa shyǵyp ketedi. Al búıirlik aǵyndardy kúsheıtetin Shúlbi sý qoımasynyń, Oba men Úlbi ózenderiniń sýy da mol ekeni ańǵarylady. Bıyl Buqtyrma 60 paıyzǵa, Shúlbi 96 paıyzǵa tolǵany anyqtaldy», deıdi basqarma basshysy.
Qazirgi ýaqytta Ertis ózeninde seń qozǵalyp jatyr. Mamandardyń sózine súıensek, alǵashqy eki kúnde jiberilgen ortasha ekpindegi sý kólemi ózen betindegi muzdy qalypty jaǵdaıda aıdap áketýge qabiletti. Negizgi sý shamamen 5-7 kúnde Pavlodar oblysynyń shekarasyna jetedi. Al úlken sýdyń kelýi shamamen 20-21 sáýirde kútilip otyr. Osy ýaqytta Ertis ózeni mańynda oryn tepken eldi mekenderge saq bolýy qajet. Qazir óńirde jaǵalaýlar men bógetterdi nyǵaıtý jumystary atqarylyp jatyr.
Jaýapty basqarmanyń dereginshe, Pavlodar oblysyndaǵy Ertis ózeni jaıylmalarynyń jalpy aýmaǵy 377 myńnan gektardan asady. Sý sonyń shamamen 300 myń gektaryna jaıylýy kerek. Negizinen jer jaǵdaıy boıynsha oıpańdaý jerde ornalasqan Aqtoǵaı, Ertis, Tereńkól, Pavlodar aýdandarynyń jaıylmalaryn kóbirek basady. Al Ertis ózeniniń ózinde sýdyń deńgeıi shamamen 2 metrge kóteriledi dep boljanyp otyr.
«Ertis ózenine osynshama kólemde mol sýdyń jiberilýi ekologııalyq jáne ekonomıkalyq turǵydan asa mańyzdy. Jaıylmalardan mal azyǵyn daıyndaıtyn azamattar úshin paıdaly. Al osy ýaqytta taıaz sýlarǵa shyǵyp, ýyldyryq shashatyn balyqtar úshin de sýdyń kóptigi tıimdi áser etedi», dedi Á.Qabyltaeva.
Sý jiberý sharalary 5 mamyrǵa qaraı tolyq aıaqtalsa, Ertis ózeni shamamen 15-16 mamyrda óz arnasyna qaıtýy kerek. Osy ýaqytta oblysta shybyn-shirkeıge qarsy óńdeý sharalary qyza túsedi dep josparlanǵan. Al jalpy óńdeý sharalaryn osy aıdyń sońyna taman bastap ketý uıǵarylyp otyr.
Pavlodar oblysy
