Foto: Aqtóbe oblysy ákimdiginiń baspasóz qyzmeti
Sondaı-aq IIM Ulttyq Ulanyna qarasty 3656 astanalyq áskerı bólimniń Mı-171E tikushaǵynyń ekıpajy áýeden Torǵaı ózeniniń tasýyn baqylap júrip, Mamyr aýlynyń janynda sý ortasynda qalǵan bir top adamdy baıqap, jedel túrde qonyp, adamdardy qaýipsiz jerge kóshirgen. 12-13 sáýirde Ulttyq ulannyń áskerı-kóliktik tikushaǵy men 3Mı-171E tikushaǵy Torǵaı ózeni aıaǵynda otyrǵan aýyldardan 1 200 adamdy qutqardy.
10 sáýirde Torǵaıdyń sýy Qostanaımen aradaǵy shekaradaǵy Mamyr aýlyna 2,5 metr bıiktikte kóterile bastady. Qostanaı oblysynyń Aqtóbemen shekarasyndaǵy Aqshyǵanaq aýlyna sý kirgende, bergi bettegi Mamyr turǵyndary da qamdana bastaǵan. Aýyl turǵyndary sý jaıylatyn jerde tosqaýyl jasap, qoldan bógesin turǵyzyp, saqtyq sharalaryn jasasa da, Qostanaı jaǵynan Torǵaıdyń ekpindi mol sýy kele qoıady dep kútpedi. О́ıtkeni eki arada qum arasynda qurǵap ketken ózekter men jylǵalar, kólshikter kóp. Tasyp kele jatqan sý jol boıyndaǵy kepken arnalardy toltyrǵan soń, aıaǵyna jetkende qarqyny azaıyp, báseńdep jetedi degen oı boldy. Bıylǵy naýryzdyń 26-27 kúnderi tasyǵan Yrǵyz ózeniniń Taldyq, Telǵara salalarynan kelgen mol sý Nura jáne Táýip aýyldyq okrýgteri aýmaǵyndaǵy kishigirim kólderge quıylyp, arnalaryn toltyryp turǵan. Yrǵyz ben Torǵaı ózenderiniń qosylar tusynda otyrǵan turǵylyqty jurt osyǵan deıin Torǵaı ózeniniń aıaǵyna jeter tusta tentek minez tanytqanyn kórgen emes. Jylda Torǵaı mamyrdyń alǵashqy onkúndiginde tasıtyn. Tasıdy degen aty bolmasa, qumnan kelgen sý syzdyqtap áreń jetetin de, keýip ketken kólderdi toltyra almaıtyn. Mol sý kelmegen soń kólderdiń orny qurǵap, sor basyp, qustary men balyǵy azaıǵan. Bıylǵy tasqyn sý aýyl adamdaryna jaısyzdyq ákelse de, qurǵap, sorǵa aınalǵan kólderdi sýǵa toltyrǵanyn aıtpaı ketpeýge bolmas. Bul kúnderi Torǵaı dalasynyń Qyzbel, Táýish, Aqshyǵanaq aýyldaryn da sý basty. Jangeldın men Yrǵyz aýdandarynyń mal baqqan jurty qyzyl sýmen ózderi alysyp jatyr, aýyl arasynda kólik qatynasy úzildi.
Qazir Yrǵyz aýdanynyń ortalyǵyndaǵy úsh mektep pen sport kesheninde ashylǵan evakýasııalyq ortalyqta Nura aýyldyq okrýginiń 600 adamy qaldy. Bul jerge jas balasy bar analar, qart kisiler, mektep oqýshylary kóshirilse, Belsher, Mamyr men Nuranyń er azamattary aýyldarynda qalyp, malyn qyrǵa shyǵaryp, úılerine sý kirmeý úshin bógesindi bekitip jatyr. Qarǵyn sýmen alysyp jatqan er azamattarǵa sýdyń aldyn bógeıtin júk tıegishter, traktorlar, jalpy aýyr tehnıka kóp kerek.
Aqtóbe oblysy
