Almaty oblysynan jınalǵan tehnıkalar quramynda kamaz, traktor, sý tasyǵysh jáne motorly qaıyqtar bar. Tehnıkany jóneltýge daıyndyq jumystaryna 300-ge jýyq adam jumyldyryldy, onyń ishinde Tótenshe jaǵdaılar departamenti, «Qazaqstan temir joly» AQ ókilderi, 32363 áskerı bóliminiń 55 áskerı qyzmetkeri jáne Qonaev qalasynyń ákimdigi qajetti materıaldardy qamtamasyz etip, jabdyqtardy platformaǵa tıedi.
Elimizge tanymal «Mareven Fýd Tıan-Shan» seriktestigi men jeke kásipker Arsamaqov sý basqan óńirlerge bara jatqan júrgizýshilerdi azyq-túlikpen qamtamasyz etti.
«Almaty oblysy ákimdiginiń bastamasymen Qonaev jáne Almaty qalalarynyń stansııalarynan Batys Qazaqstandaǵy sý tasqynyna qarsy kúreske jalpy sany 166 arnaıy tehnıka jiberiledi, jaqyn mańdaǵy óńirlerden Almaty oblysy jaldaǵan 41 tehnıka apat aımaqtarynda jumysyn bastady. Keshe 60 tehnıka jáne ishinde 4 qaıyq tıelgen 47 platforma jolǵa shyqty. Sonymen qatar 65 tehnıka platformalarǵa tıelip jóneltýdi kútip tur. Ár poıyz daıyn bolǵan boıda jóneltilip otyrady. Ár tehnıkaǵa júrgizýshi taǵaıyndalyp, olar da poıyzdyń basyndaǵy jolaýshylar vagonyna ornalasqan. Bul sharaǵa oblys kásipkerleri, kommýnaldyq qyzmetter men oblystyq basqarmalar, sonymen qatar sharýa qojalyqtary qatysyp jatyr. Halqymyzdy tabıǵattan kelgen tosyn jaǵdaıdan qaıtkende aman alyp shyǵýǵa atsalysamyz, bizdiń kúshimiz – birlikte», dedi oblys ákiminiń orynbasary Almas Batanov.
Aıta keteıik, osy aıdyń basynda oblystyq tótenshe jaǵdaılar departamenti Atyraý qalasyna 33 jeke quram men 13 tehnıka attandyrdy, olar kúni búginge deıin jumystaryn jalǵastyryp jatyr. Abaı aýdanyna 6 qutqarýshy men 2 birlik tehnıka jiberildi. Al búgin 4 qutqarýshy men 2 qaıyq jóneltiledi.
Jóneltilgen tehnıka shamamen úsh kún jol júrip, ýchaskege jetken soń barlyq qajetti jumystarda paıdalanylady.
