foto: vıdeodan kadr
Buǵan deıin áleýmettik jelide Esentaı ózenindegi sýdyń aǵyny jyldam ekenin ańǵartqan vıdeo paıda bolǵan edi.
Aıta keteıik, qala arqyly tórt ózen – Aqsaı, Qarǵaly, Úlken jáne Kishi Almaty aǵyp ótedi.
«Jaýyn-shashynǵa baılanysty ózenderde sý deńgeıiniń shamaly kóterilýi, sondaı-aq kólbeý aǵynǵa baılanysty sý laılanýynyń 2 ballǵa deıin artýy baıqalady. Qazirgi ýaqytta «Qazseldenqorǵaý» MM Almaty qalalyq paıdalaný tehnıkalyq basqarmasynyń 10 gıdroposty jumys istep tur, olar táýlik boıy ózenderdegi gıdrometeorologııalyq jaǵdaıdy baqylaıdy», dep habarlady Almaty qalalyq TJD baspasóz qyzmeti.
Sondaı-aq «Qazseldenqorǵaý» mamandary selden qorǵaıtyn qurylystardyń tehnıkalyq jaǵdaıyna tekserý júrgizip jatyr. Tótenshe jaǵdaılar departamenti men «Qazseldenqorǵaý» Almaty ózenderindegi jaǵdaı turaqty ekenin málimdedi.
«26 naýryzdan bastap qalalyq Tótenshe jaǵdaılar departamentiniń jeke quramy qyzmettiń kúsheıtilgen rejımine kóshti, jedel shtab jumys istep jatyr, sonymen qatar «Qazseldenqorǵaý» qalalyq fılıalynan kún saıyn 20 adamnan turatyn mehanıkalandyrylǵan brıgada jasaqtalynady», dep qosty qalalyq TJD bastyǵy Nurlan Atyǵaev.
Esterińizge sala keteıik, 16 sáýir kúni tańǵy saǵat 4:00-de Almatyda jańbyr jaýdy. «Qazgıdromet» RMK málimeti boıynsha, saǵat 9:00-de qalada 14 mıllımetr, Medeýde 21 mıllımetr, Kamen ústirtinde 28 mıllımetr jaýyn-shashyn jaýǵan. Sınoptıkterdiń boljamyna sáıkes, ótkinshi jańbyr 17 sáýirge deıin jaýady.
