Senbilik barysynda Qonaev qalasynyń saıabaq aımaǵynda myńǵa jýyq aǵash kósheti otyrǵyzyldy. «Taza Qazaqstan» respýblıkalyq aksııasyna 300 myńnan asa adam qatysty. Atap aıtqanda, oblystyń 250 myńǵa jýyq turǵyny men jergilikti atqarýshy jáne ortalyq memlekettik organdardan 18 700, kásiporyndar men uıymdardan 28 myń adam qorshaǵan ortaǵa janashyrlyǵyn tanytty. Nátıjesinde, jarty kúnniń ishinde óńirde 20 myń tonnaǵa jýyq qoqys syrtqa shyǵaryldy. Tazalyq aksııasy aıasynda aýlalardy qalpyna keltirý, syrlaý jumystary júrgizildi.
«Oblystyń árbir turǵynyn osyndaı aýqymdy aksııaǵa qatysýǵa, óńirimizdiń tazalyǵyna óz úlesin qosýǵa shaqyramyn. Aınalanyń taza bolýy – adamzattyń, ósirip otyrǵan urpaǵymyzdyń saýlyǵy ekenin umytpaıyq», degen oblys ákimi Marat Sultanǵazıevtiń ózi de qolyna kúrek ustap, aǵash otyrǵyzdy.
Senbilik barysynda óńir basshysy 4 jáne 7-saıajaı alaptarynyń turǵyndarymen kezdesti. Gaz jáne sýmen jabdyqtaý, joldardy jóndeý máselelerin kótergen turǵyndardyń tilegin tyńdady. Saıajaı turǵyndary oblys ákimine atqarylyp jatqan tıimdi jumysy, halyqqa ashyqtyǵy men jaqyndyǵy úshin alǵys bildirdi. Kezdesý barysynda jer ýchaskelerine, kólikke, mektepter men balabaqshalarǵa qatysty máseleler kóterildi. Barlyǵyn muqııat tyńdaǵan Marat Eleýsizuly turǵyndarǵa naqty túsinikteme berdi.
Kóshet egýge keler bolsaq, oblystaǵy eldi mekenderde 32,5 gektardy quraıtyn aýmaqqa jalpy sany 13 700 tal aǵash otyrǵyzyldy.
Almaty oblysy
