Memleket basshysy Qasym-Jomart Toqaev bir sózinde: «Qazaqstan – daryndy jastar mekeni. Erteń elimizdiń abyroıyn asyratyn da – osy talantty ul-qyzdar. Biz olardyń órisin ashyp, qarym-qabiletin shyńdaý úshin bar múmkindikti jasaýǵa tıispiz», degen edi.
Búginde el Prezıdentiniń daryndy jastardy qoldaý baǵytyndaǵy baıandy bastamalary júıeli júzege asyp jatyr. Bul konsert sonyń naqty dáleli dese de bolady.
Kolledjdegi «Teatr dekorasııasy óneri» mamandyǵynyń stýdentteri sahnany bezendirý isine atsalysyp, kórme uıymdastyrdy. «Akter óneri» mamandyǵy men osy «Teatr dekorasııasy óneri» mamandyǵynyń shákirtteri jáne jetekshileri árdaıym tyǵyz jumys isteıdi. Dıplomdyq jumys kezinde ártister kıetin kostıýmniń dızaınyn ázirlep, sahnanyń bezendirý isine kóp kúsh salady.
Osylaısha, konserttik baǵdarlama folklorlyq mýzyka yrǵaǵymen arnaıy ázirlengen prologtan bastaldy. Sahna túrilgen sátten-aq ár shákirttiń óner dep soqqan júrek lúpili, ystyq yqylasy kózge ottaı basyldy. Konsert rejısseri baılanystyrýshy keıipker retinde ár sátti sabaqtastyryp, stýdentterdiń júıeli óner kórsetýine basa mán berdi. Kolledjdegi oqytýshy-professorlyq quramnyń osy ýaqytqa deıingi eseli eńbegi aqtalyp, sanaly urpaqtyń boıyna sińirgen sapaly bilimi anyq ańǵaryldy.
Teatr óneri jáne ónertaný fakýltetiniń dekany, Qazaqstannyń eńbek sińirgen qaıratkeri Aqysh Omardyń aıtýynsha, mundaı is-shara talantty jastardyń talabyn ushtap, jemisti jetistikterge jeteleıdi.
«Teorııalyq turǵyda berilgen bilimdi árdaıym tájirıbemen ushtastyryp otyrý qajet. Mundaı is-sharalarda shákirtterimiz eń aldymen úlken sahnada, kóziqaraqty kórermen aldynda ózin erkin ustaýdy, barynsha ashylyp, shynaıy óner kórsetýdi úırenedi. Kolledjde alǵan biliminiń naqty nátıjesin kóredi. Qanatyn qomdap, óner aıdynyna asyqqan jalyndy jastarǵa dál osyndaı konserttik baǵdarlamalar aýadaı qajet», dedi ol.
Is-shara barysynda kolledj shákirtteri ár kýrstyń baǵdarlamasyna saı óner kórsetti. Máselen, 1-kýrsta tálim alatyn jastar túrli taqyryp boıynsha «Sahna tili» páninen trenıng-jattyǵýlardy, «Akterlik sheberlik» páni aıasynda jan-janýarlardy baqylaý álemi etıýdterin usyndy.
Al 2-kýrsta bilim alatyn stýdentter ádebı-mýzykalyq kompozısııa men jan-janýarlardy baqylaý álemi etıýdterin sahnalady. Sondaı-aq «Sýretterdi tiriltý» taqyrybynda óz ónerlerin ortaǵa saldy.
Bul rette, 3-kýrs stýdentteri «Sahna tili» páninen monolog oqyp, «Akterlik sheberlik» páni boıynsha pesalardan úzindi keltirdi. О́z kezeginde, 4-kýrs stýdentteri prozadan úzindiler oqyp, «Akterlik sheberlik» páni boıynsha etıýdter usyndy.
Aıta keteıik, «Akter óneri» – atalǵan kolledjdegi jańa ashylǵan mamandyqtardyń biri. Alǵashqy túlekterin 2021 jyly ushyrsa da, el jastary arasynda oǵan degen qyzyǵýshylyq deńgeıi óte joǵary. Talapkerler dál osy mamandyqty tańdap, oqýǵa túskisi keledi.
Dýman ÁKIM,
teatr pániniń oqytýshysy
