Astana qalasynan keıingi 5 aıda 2 myńnan asa qońyraý kelip túsip, habar ıeleri zorlyqtan qutqarýdy ótingen. О́kinishtisi, bileginiń kúshin áıeline batyryp, taıaqtap, bassyzdyqqa salynyp, balasyn sabaıtyndar elimizde kún sanap kóbeıip barady.
Prezıdent Q.Toqaev qol qoıǵan «Áıelderdiń quqyqtaryn jáne balalardyń qaýipsizdigin qamtamasyz etý týraly» zańdy Májilis depýtattary 2023 jyldyń qyrkúıeginde Memleket basshysynyń turmystyq zorlyq-zombylyqqa jaýapkershilikti kúsheıtýdi tapsyrǵan Joldaýynan keıin ázirlegen bolatyn.
Qujatty daıyndaýǵa Bala quqyqtary jónindegi ýákil Dınara Zákıeva, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, sondaı-aq Ulttyq quryltaıdyń músheleri belsene atsalysty. Parlament Májilisindegi talqylaýlarmen qatar Senatta ǵana jıyrmaǵa jýyq jumys otyrysy ótip, jan-jaqty talqylandy. Sondyqtan ıini qanǵan zańdardyń biri deýge tolyq negiz bar.
Negizgi zańnamalyq jańashyldyqtarǵa toqtalsaq, turmystyq zorlyq-zombylyqty krımınalızasııalaý, balalarǵa qatysty zorlyq-zombylyqtyń barlyq túri úshin jazany kúsheıtý jáne onymen kúresýde aldyn alý sharalarynyń tutas kesheni bar.
Áıelder men balalardyń quqyqtaryn qorǵaý – memlekettik saıasattyń basym baǵyttarynyń biri. Memleket basshysy bul máselege basa nazar aýdaryp keledi. Ulttyq quryltaıdyń úshinshi otyrysynda Prezıdent turmystyq zorlyq-zombylyqpen keshendi kúres izgilik jolyndaǵy qoǵam kelesheginiń kepili ekenin atap ótti.
Turmystyq zorlyq-zombylyq pen býlıngten zardap shekkenderge kómek kórsetetin 111 senim telefonynyń iske qosylǵanyna jarty jyl ótti. Ortalyqqa osy kúnge deıin 10 myńnan asa adam júgingen eken. Jańa zań mundaı ókinishti kórsetkishtiń kemýine kómektesedi degen senim mol.
Bıbigúl JEKSENBAI,
Senat depýtaty
